കല്ലുപെന്‍സില്‍

ഓര്‍മ്മയിലെ മഴ

2008-06-16T10:59:00.004+05:30

വള്ളിനിക്കറുമിട്ടു ബാല്യം വീണ്ടുമെത്തുന്നു.. ഓര്‍മ്മ
ത്തുള്ളികള്‍ മഴയായി വീണ്ടും മുന്നിലെത്തുന്നു
വെള്ളമേറിയ മുറ്റമിന്നൊരു പൊയ്‌കയാവുന്നു.. കളി
വള്ളമിട്ട മനസു വീണ്ടും കുളിരു കോരുന്നു.

കാറ്റുവന്നു പതുക്കെയെന്‍‌റെ അടുത്തുനില്‍‌ക്കുന്നു ...ഒരു
ചാറ്റലെന്‍‌റെ കുരുന്നു നെഞ്ചില്‍ തൂവിയേകുന്നു.
പച്ചയിട്ടു നനഞ്ഞപാടം ഞൊറിയുടുക്കുന്നു... അതു
കൊച്ചുകണ്ണുവിടര്‍ത്തി വീണ്ടും നോക്കി നില്‍ക്കുന്നു

മെല്ലെമാനമിരുണ്ടുവീണ്ടുമൊരുങ്ങിനില്‍ക്കുന്നു . ഒരു
മുല്ലഗന്ധം മുന്നില്‍ വന്നു നിറഞ്ഞു നില്‍ക്കുന്നു.
കണ്ണടച്ചാ ഗന്ധമുള്ളില്‍ ഞാന്‍ പടര്‍ത്തുന്നു .. വീണ്ടും
കാതിലൊരു പേമാരിനൃത്തം ചുവടു വക്കുന്നു

ഓലമേഞ്ഞപുരപ്പുറത്തൊരു മേളമേറുന്നു കു-
ഞ്ഞോട്ടയില്‍ക്കൂടിറ്റുവെള്ളം നെറുക നേടുന്നു
അപ്പുറത്തെന്നമ്മയൂതിയൊരുക്കിവക്കുന്ന - കട്ടന്‍
കാപ്പിഗന്ധം നെഞ്ചില്‍ മറ്റൊരു സ്നേഹമേകുന്നു

ചാഞ്ഞവാഴയ്‌ക്കൂന്നു നല്‍കി നനഞ്ഞു നില്‍ക്കുമ്പോള്‍ - നെഞ്ചില്‍
ചായുവാന്‍ ഞാനോടിയച്ഛന്നരികിലെത്തുന്നു
നെറ്റിയില്‍ പൊന്‍‌‌വിയര്‍പ്പും നീര്‍ത്തുള്ളിയും ചേരും .. നേര-
ത്തിറ്റുനേരം വാരിയെന്നെ മാറിലേറുന്നു..

വള്ളിനിക്കറുമിട്ടു ബാല്യം വീണ്ടുമെത്തുന്നു.. മാരി-
ത്തുള്ളികള്‍ സ്‌മൃതിയായി വീണ്ടും മുന്നിലെത്തുന്നു
പൊള്ളുമീ നഗരത്തില്‍ ഞാനൊരു മൌനമാകുന്നു.. വീഴും
കണ്ണുനീരില്‍ ഞാനുമിന്നൊരു പൊയ്കയാവുന്നു...

പള്ളിക്കൂടമടച്ചല്ലോ ഇനി.....

2008-04-16T10:45:00.002+05:30

പള്ളിക്കൂടമടച്ചല്ലോയിനി
തുള്ളിച്ചാടി നടക്കാലോ
പുള്ളിയുടുപ്പിട്ടങ്ങേക്കാവില്‍
പൂരം കാണാന്‍ പോകാലോ
കൊന്നപ്പൂക്കണി വക്കും ദൂരെ
കുന്നിന്‍ മുകളില്‍ ചെല്ലാലോ
കൂട്ടരുമൊത്തു കളിച്ചു മദിച്ചൊരു
പാട്ടും പാടി നടക്കാലോ
അച്ചന്‍ കോവില്‍ പുഴയുടെ നടുവില്‍
കൊച്ചൊരു തോണിയിലെത്താലോ
വെള്ളം ചെപ്പി ചെപ്പിയിരുന്നൊരു
വല്ലം കഥകള്‍ ചൊല്ലലോ
നെല്ലിയുലുത്തിയുലുത്തിയൊരിത്തിരി
അല്ലിക്കാമണി തിന്നാലോ
മഞ്ചാടിക്കുരുയൊരുപിടി വാരി
കൊഞ്ചിക്കൊഞ്ചിയിരിക്കാലോ
കല്ലിലിടിച്ചൊരു പുളിയന്‍ മാങ്ങ
കല്ലുപ്പിട്ടു കഴിക്കാലോ
ചെല്ലക്കുയിലു വിളിക്കും നേരം
തുള്ളിക്കൂടെ പാടാലോ
വള്ളിക്കുടിലു മെനഞ്ഞിട്ടുള്ളില്‍
വെള്ളാരം കല്ലാടാലോ
തത്തിതത്തിച്ചാടും ചേച്ചി-
ക്കൊത്തു കളത്തില്‍ കൂടാലോ
പള്ളിക്കൂടമടച്ചല്ലോയിനി
പുസ്തകമൊന്നു മടക്കാലോ
മണ്ണും മഴയും വെയിലും കുളിരും
കണ്ണുനിറച്ചിനി കാണാലോ

(എല്ലാ കൂട്ടുകാര്‍ക്കും മദ്ധ്യവേനല്‍ അവധി ആശംസകള്‍ - പുസ്തകം മടക്കൂ... കമ്പ്യൂട്ടറും ഹാരിപോട്ടറും മാറ്റി വക്കൂ.. മണ്ണിലേക്ക് ചാടി മറിഞ്ഞു നടക്കൂ........)

രാധയും അച്ഛനും ഓഡിയോ

2008-04-04T09:28:00.002+05:30

“രാധയും അച്ഛനും ആകാശവും“ എന്ന കവിത ശ്രീ മനോജ് ചൊല്ലിയത് ഇവിടെ.
http://www.kapeesh.com/music/blog/GManu-Radha-aakaasam.mp3

രാവിലീയാകാശ വിസ്മയം കാണുവാന്‍
രാധയും അച്ഛനുമൊത്തുചേര്‍ന്നു
എണ്ണിയാല്‍ തീരാത്ത താരങ്ങളാദൂര
വിണ്ണിലായ്‌ മിന്നുന്ന കണ്ടു നിന്നു
പാലാഴിപോലലയാടുന്ന വാനിലായ്‌
ആലോലമോടും മുകില്‍നിരയില്‍
ചിമ്മിയും മങ്ങിയും കണ്ണുകവര്‍ന്നും കൊ-
ണ്ടമ്മട്ടിലെത്രയോ നക്ഷത്രങ്ങള്‍

"എത്രയുണ്ടച്ഛായിതെത്രദൂരത്തച്ഛാ
യെത്രയുണ്ടാവുമതിന്നപ്പുറം"

"കോടാനുകോടികള്‍ പിന്നെയും കോടികള്‍
ഓടിനടക്കും പ്രപഞ്ചമിതില്‍
നമ്മുടെപോലെത്ര സൂര്യന്‍മാര്‍, ഭൂമികള്‍
നമ്മളെപ്പോലെത്ര ജീവിതങ്ങള്‍
കുന്നുകള്‍, പൊയ്കകള്‍ കന്നിനിലാവുകള്‍
കുന്നിമണികള്‍ പെറുക്കും പൈതല്‍
അച്ഛനെക്കാത്തു പടിക്കലിരിക്കുന്ന
കൊച്ചുകിടാവുകള്‍ അമ്പലങ്ങള്‍
മഞ്ഞുപൊഴിയും പുലരികള്‍ മന്ദാര
മഞ്ഞപടരുന്ന പൂവാടികള്‍
പള്ളികള്‍ പള്ളിയില്‍ പോവുന്നോരമ്മമാര്‍
പള്ളിക്കൂടങ്ങള്‍ കളിക്കളങ്ങള്‍
ഒക്കെയുമുണ്ടാകാമൊട്ടേറെയാക്കൊച്ചു
നക്ഷത്രലോകത്തു നമ്മെപ്പോലെ"

അച്ഛന്‍‌റെ വാക്കുകള്‍ കേട്ടു രാധ യിളം
കൊച്ചുമിഴികള്‍ വിടര്‍ത്തിനിന്നു
നക്ഷത്രമായിരമക്കണ്ണില്‍ കണ്ടച്ഛന്‍
നെഞ്ചോടു ചേര്‍ത്തു പിടിച്ചു നിന്നു..

പാപ്പിയും പീപ്പിയും പിന്നെ ബലൂണും

2008-03-31T09:48:00.003+05:30

രണ്ടു കുട്ടിക്കവിതകള്‍ എം.പി.ത്രീയില്‍

പാപ്പിയും പീപ്പിയും

"പാപ്പീ പാപ്പീ ചൊല്ലാമൊയീ
പീപ്പിയിതെങ്ങനെയുണ്ടാക്കി
പപ്പാവാങ്ങിത്തന്നതുപോല-
ല്ലപ്പീയെന്തൊരു ശബ്ദമെടാ"

"അന്തോണീയൊരു പീപ്പിക്കായി-
ട്ടെന്തിനു ചില്ലറ കളയേണം?
തെങ്ങോലക്കാല്‍ മെല്ലെയടര്‍ത്തീ-
ട്ടിങ്ങനെയൊന്നുചുരുട്ടിയെട്‌
കൊച്ചീറ്‍ക്കില്‍ത്തുണ്ടറ്റത്തിങ്ങനെ
കുത്തിയിറക്കിയൊരുക്കിയെട്‌
കുഞ്ഞറ്റത്തൊരു ഞെക്കുകൊടുത്താല്‍
കുഞ്ഞേ നിന്നുടെ പീപ്പി റെഡി

പപ്പായോടുപറഞ്ഞേക്കൂ ഇനി
പീപ്പിക്കാശിനു മുട്ടായി... "

------------------

ബലൂണ്‍

പൊങ്ങിപ്പൊങ്ങിപ്പൊങ്ങി നടക്കും
പൊങ്ങച്ചക്കാരന്‍
കുടവയറുംകൊണ്ടോടി നടക്കും
കുടചൂടാ മാമന്‍
പുള്ളിയുടുപ്പും കള്ളിയുടുപ്പും
പുള്ളിക്കെന്തിഷ്ടം
അമ്മുക്കുട്ടിയടുത്തു വിളിച്ചി-
ട്ടുമ്മകൊടുത്താലും
അപ്പുക്കുട്ടനടുത്തുവിളിച്ചൊരു
തൊപ്പിയണീച്ചാലും
കാറ്റു വിളിച്ചാല്‍ കൂടെപ്പോകും
കള്ളന്‍ കുഞ്ഞമ്മാന്‍
തൊട്ടാവാടിപ്പെണ്ണുവിളിച്ചൊരു
പൊട്ടുതൊടീച്ചപ്പൊള്‍
അയ്യൊ പൊട്ടിപ്പോയേ
ഞങ്ങടെ പൊങ്ങച്ചക്കാരന്‍

******************
“മകളേ വളരാതിരിക്കുക“ എന്ന കവിത വനിതാലോകത്ത്
http://vanithalokam.blogspot.com/2008/03/7.html

ഇതെന്തേയിങ്ങനെ?

2008-03-24T11:42:00.003+05:30

അമ്മേ അമ്മേ കണ്ടോ ഭിത്തിയില്‍
അമ്മു ചിരിക്കുന്നു
ഇമ്മിണി നല്ലൊരു കമ്മലുമിട്ടി-
ട്ടമ്മു ചിരിക്കുന്നു.
ഇങ്ങോട്ടൊന്നും ചെരിഞ്ഞാലും ഞാ-
നങ്ങോട്ടായാലും
എന്നെ മാത്രം നോക്കിയിരുന്നെ-
ന്നമ്മു ചിരിക്കുന്നു
കട്ടില്‍പടിയില്‍ കയറിയിരുന്നി-
ട്ടൊട്ടു കുനിഞ്ഞാലും
കട്ടിളവക്കില്‍ പമ്മിയിരുന്നി-
ട്ടൊട്ടു നിവര്‍ന്നാലും
എന്നെത്തന്നി നോക്കിയിരുന്നെ-
ന്നമ്മു ചിരിക്കുന്നു
എങ്ങനെ ഫോട്ടോ കണ്ണുതിരിച്ചി-
ട്ടെന്നെ നോക്കുന്നു?

(നേരെ നോക്കുന്ന ഫോട്ടോയുടെ കണ്ണൂകള്‍ നോക്കുന്ന ആളിനെ പിന്തുടരുന്നതെങ്ങനെ.. ചെരിഞ്ഞ പോസുള്ളതില്‍ അത്‌ തോന്നാത്തതെന്തുകൊണ്ട്‌.. ടെക്കികള്‍ ഒന്നു വിശദീകരിക്കാമോ?)

ഈ പ്രതിഭാസത്തിനൊരു വിശദീകരണം ശ്രീലാല്‍ തപ്പിയെടുത്തത് ഇവിടെ

ഈ കവിത മനോജ് ഇവിടെ ചൊല്ലിയിട്ടുണ്ട്

ഉണ്ണീ നീ കണ്ണുതുറക്കുക

2008-03-20T16:17:00.006+05:30

ഉണ്ണീ നീ കണ്ണുതുറന്നൊന്നു കാണുകീ
മണ്ണും മരവും മഴത്തുള്ളിയും
പൂവിന്‍റെ പുഞ്ചിരിച്ചുണ്ടും അരികിലെ
പൂമ്പാറ്റ വയ്ക്കും മണിച്ചുവടും
ഉണ്ണീ നീ കണ്ണുതുറക്കാതെ കാണുകീ
മണ്ണിനെ താങ്ങുന്ന കാരുണ്യവും
ദൂരത്തുനിന്നും കുളിരു ചുമന്നു നിന്‍
ചാരത്തേക്കോടിയണഞ്ഞ കാറ്റും
വെട്ടംവിളമ്പുന്ന സൂര്യനും നിന്‍ മിഴി
പൂട്ടിയുറക്കുമിരുട്ടും ലാവും
കാലത്തുനിന്നെയുണര്‍ത്തുവാനെത്തുന്ന
കോലക്കുയിലിന്‍റെ നെഞ്ഞിടിപ്പും
കോലായില്‍ നിന്നെ ചിരിപ്പിക്കാനെത്തുന്ന
കൂനനുറുമ്പില്‍ വരനടത്തോം
മുറ്റത്തു മിണ്ടാതിരുന്നു ചിരിക്കുന്ന
ചെത്തിയും മന്ദാരപ്പൂവിതളും
കൊച്ചുമണംകൊണ്ടു വാരിപ്പുതയ്ക്കുന്ന
പിച്ചിയും മുല്ലയും പാരിജാതോം
അല്ലിത്തളിര്‍ച്ചുണ്ടിലൊത്തിരി മാധുര്യം
നുള്ളിത്തരുന്നൊരീ വാഴക്കൂമ്പും
താഴേ തൊടിയും തൊടിയിലെ വെള്ളവും
താഴമ്പൂ ഗന്ധവും താരിതളും
എന്തെല്ലാമെന്താലും ഉണ്ടുനിനക്കായി
എന്തേകരയുന്നു വീണ്ടും വീണ്ടും
ഉണ്ണീ നീ കണ്ണുതുറന്നൊന്നു നോക്കുക
ഉണ്ടു ചിരിക്കുകീ നന്മകളെ

(പ്രിയ സുഹൃത്ത് സുഗതരാജ് പലേരിക്ക് ഇന്നു ജനിച്ച ഉണ്ണിക്കുട്ടന് ഈ കവിത കൊടുക്കുന്നു.. മിടുക്കനായി മനുഷ്യനായി വളരാന്‍ ആശംസ........)

കുടുകുടു കുക്കുടു ബോട്ട്

2008-03-18T12:14:00.002+05:30

കട്ടപ്പനയില്‍നിന്നും നമ്മുടെ
കുട്ടനു കിട്ടിയ ബോട്ടാണേ
എട്ടരരൂപ തുട്ടിനു വാങ്ങീ-
ട്ടേട്ടന്‍ നല്‍കിയ ബോട്ടാണേ

വട്ടപ്പാത്രമെടുത്തിട്ടമ്മു-
ക്കുട്ടീ വേഗം വന്നാട്ടെ
കിട്ടാ വെള്ളമൊഴിയ്ക്കൂ സീത-
ക്കുട്ടീ കൈത്തിരി തന്നാട്ടേ

പെട്ടെന്നിത്തിരിയെണ്ണയൊഴിച്ചീ
തട്ടമകത്തിനി വക്കട്ടെ
കുടുകുടു നീങ്ങുന്നതു നീ കണ്ടോ
ഗുട്ടന്‍സെന്താ കുട്ടൂസേ

(കളിബോട്ടിലെ കുഴലില്‍ വെള്ളം നിറച്ച്‌, അകത്ത്‌ വിളക്കു കൊളുത്തി വയ്ക്കുമ്പോള്‍ കുടുകുടാ നീങ്ങുന്നതിന്‍റെ രഹസ്യം അച്ഛനോടു ചോദിക്കൂ കുട്ടികളെ)

നെല്ലീ നെല്ലീ നെല്ലിക്ക

2008-03-08T13:09:00.005+05:30

നെല്ലീ നെല്ലീ മുറ്റത്തങ്ങനെ
നില്ലേ നില്ലേ കിന്നാരീ
നല്ലൊരു കള്ളം ചൊല്ലും കാറ്റിനു
നുള്ളുകൊടുക്കെടീ ചിങ്കാരീ
മുല്ലചിരിക്കും നേരത്തവളെ
മെല്ലെവിളിക്കെടീ കാന്താരീ..
തെല്ലുകഴിഞ്ഞിട്ടല്ലിക്കാ മണി
നുള്ളിയടര്‍ത്തിത്തരുമോ നീ
പല്ലുപുളിക്കും നേരത്തിത്തിരി
വെള്ളമെടുത്തുകുടിക്കുമ്പോള്‍
ചൊല്ലെടി മധുരം നല്‍കും നീയൊരു
കള്ളിയതല്ലേ കല്യാണീ

ആലീസിനൊരു വിമാനം..

2008-02-28T10:41:00.001+05:30

ആലീസിനൊരു കടലാസുവിമാനം വേണം എന്ന കവിത ചൊല്ലി പോസ്റ്റുന്നു..

വെള്ളക്കടലാസു നുള്ളിയെടുത്തൊരു
വള്ളമുണ്ടാക്കി വിരുതനുണ്ണി
വെള്ളത്തിലിട്ടതു നീങ്ങുന്ന കണ്ടപ്പൊ
തുള്ളിച്ചിരിച്ചു മിടുക്കന്‍ അമ്പി
കല്ലിട്ടൊരോളത്താല്‍ പിന്നെയും നീങ്ങുന്ന
കണ്ടു കുതിച്ചു മദിച്ചുണ്ണൂണ്ണി
കൂനനുറുമ്പിനെ കാശുവാങ്ങാതുള്ളില്‍
കേറ്റിയിരുത്തിമിടുക്കിയല്ലി
പച്ചപ്പുല്ലൊന്നു പറിച്ചെടുത്തറ്റത്തു
കുത്തിവച്ചൊന്നു ചിരിച്ചമ്മിണി
തുമ്പപ്പൂകൈയാലിറുത്തെടുത്തക്കരെ
തുമ്പിക്കു നല്‍കാന്‍ പറഞ്ഞമ്പിളി
അങ്ങു ദൂരെ കടലമ്മയ്ക്കു നല്‍കുവാന്‍
ഉമ്മനിറയെ കൊടുത്തു നീലി
വര്‍ണ്ണക്കടലാസു നീട്ടി കുഞ്ഞാലീസൊ-
ന്നുണ്ണിയെ മാടി വിളിച്ചു നിന്നു
"ഉണ്ണീയെനിക്കു വിമാനം നീ നല്‍കുമോ
വിണ്ണിന്നുമപ്പുറം പോന്നൊരെണ്ണം
ആകാശക്കോണിലിരുക്കുമെന്നമ്മയ്ക്കൊ-
രായിരം ഉമ്മ കൊടുത്തുവിടാന്‍.... "

കൊച്ചു കളിപ്പെട്ടി മന്ത്രപ്പെട്ടി

2008-02-20T15:32:00.002+05:30

അച്ഛനവധിയ്ക്കു വന്നപ്പോള്‍ തന്നല്ലോ
കൊച്ചു കളിപ്പെട്ടി മന്ത്രപ്പെട്ടി
കൂട്ടിനെലിയുള്ള കിന്നാരപ്പൂമ്പെട്ടി
കൂട്ടുകൂടാനുള്ള കുഞ്ഞിപ്പെട്ടി
തൊട്ടൊന്നുണര്‍ത്തിയാല്‍ താമരപ്പൂവുകള്‍
പെട്ടെന്നു മുന്നില്‍ തെളിയ്ക്കും പെട്ടി
പാട്ടുകള്‍ കേള്‍പ്പിക്കും ചിത്രം വരപ്പിയ്ക്കും
പട്ടണം കാണിക്കും ചെല്ലപ്പെട്ടി
ദൂരത്തുള്ളേട്ടനെ ചാരത്തു കാണിക്കും
കാര്യങ്ങള്‍ കേള്‍പ്പിക്കും പൊന്നും പെട്ടി
അക്കയ്ക്കു ജോലിയ്ക്കു പോകുവാന്‍ ടിക്കറ്റ്‌
വെക്കമെടുത്തു തരുന്ന പെട്ടി
അമ്മയ്ക്കണിയാന്‍ വളകളും ചേച്ചിയ്ക്ക്‌
കമ്മലും വാങ്ങിത്തരുന്ന പെട്ടി
പാവമനുജനടുത്ത പരീക്ഷയ്ക്ക്‌
പാഠങ്ങളൊക്കെ കൊടുക്കും പെട്ടി
എന്തുചോദിച്ചാലും നല്‍കുന്ന പൂമ്പെട്ടി
എന്തിഷ്ടമാണെന്നോ കുഞ്ഞിപ്പെട്ടീ

ചെല്ലക്കിടാത്തിയും ചെമ്പരത്തിയും

2008-02-18T10:40:00.007+05:30

"കാറ്റുവന്നെന്തോ പറഞ്ഞല്ലോ നിന്നോട്‌
കൂട്ടുകാരീ എന്‍റെ കൂട്ടുകാരീ
മിണ്ടാതെ മുറ്റത്തിരുന്നു ചിരിക്കുന്ന
മണ്ടീ കടുംചോപ്പു ചെമ്പരത്തീ"

"ഇല്ല ഞാന്‍ ചൊല്ലില്ല ചെല്ലക്കിടാത്തി നീ
നുള്ളിയാലും ഞാന്‍ പറയുകില്ല
കാലത്തു മാമുണ്ണും നേരത്തു നീയെന്‍റെ
ചാരത്തു നിന്നു മറഞ്ഞതല്ലേ.. "

"അമ്മവിളിച്ചാലരകില്‍ ചെന്നില്ലെങ്കില്‍
അമ്പോ എനിക്കടി കിട്ടുകില്ലേ
അമ്പെടീ നിന്നെക്കളഞ്ഞിട്ടു ദൂരത്ത്‌
മുമ്പെങ്ങും പോയിട്ടില്ലോര്‍മ്മയുണ്ടോ.. "

ഉച്ചയ്ക്ക്‌ ചോറുണ്ണാനെന്നെ കളഞ്ഞിട്ടു
കൊച്ചേ നീയോടിയതോര്‍മ്മയില്ലേ
കൊച്ചരിപ്പുഞ്ചിരി തന്നിട്ടും നീയെന്നെ
കൊച്ചാക്കി മിണ്ടാതെയോടിയില്ലേ "

"അച്ഛന്‍ വിളിച്ചാലരികില്‍ ചെന്നില്ലെങ്കില്‍
കൊച്ചടിയഞ്ചാറു കിട്ടുകില്ലേ
കൊച്ചുമഴയത്തും കൂട്ടിനു നിന്നില്ലേ
കൊച്ചമ്മേയൊട്ടുമതോര്‍മ്മയില്ലേ... "

"സന്ധ്യയ്ക്ക്‌ മുത്തശ്ശി മാടിവിളിച്ചപ്പോള്‍
എന്തേപറയാതെ പോയിവേഗം
അഞ്ചിതള്‍ തുമ്പിലും കുങ്കുമം തന്നിട്ടും
അമ്പോ കടന്നു കളഞ്ഞില്ലേ നീ"

"നാമം ജപിക്കുവാനമ്മൂമ്മ ചൊല്ലിയാല്‍
നാണക്കേടല്ലേയടുത്തില്ലെങ്കില്‍
ചൊല്ലിക്കഴിഞ്ഞു ഞാനോടിയടുത്തില്ലേ
അല്ലിക്കവിളത്തൊരുമ്മ നല്‍കാന്‍"

"കാറ്റുപറഞ്ഞു നിന്‍ കള്ളച്ചിരിയുമെന്‍
കാഞ്ചനപ്പൂമ്പൊടീമൊന്നുപോലെ
പിന്നെപ്പറഞ്ഞവന്‍ ചെല്ലക്കിടാത്തി നിന്
‍പിന്നും മുടിയേറെയിഷ്ടമെന്ന്.. "

** ഈ കവിത ഇവിടെ ചൊല്ലിക്കേള്‍ക്കാം
ഇത് പാടിയ പോസ്റ്റ് ചെയ്ത ശ്രീ മനോജിനെ ഒരുപാട് നന്ദി)

അപ്പച്ചാ........ അച്ചപ്പം

2008-01-18T10:52:00.000+05:30

"അപ്പച്ചാ പല കണ്ണികളുള്ളോ-
രച്ചപ്പം കണ്ടോ
അപ്പച്ചിക്കിതു കണ്ടുകഴിഞ്ഞാ-
ലപ്പം കൊതിയൊപ്പം"

"പാപ്പച്ച കളി വേണ്ടാ എന്നോ-
ടച്ചപ്പക്കൊതിയാ
അപ്പച്ചിക്കൊതി ചൊല്ലിത്തന്നി-
ട്ടച്ചപ്പം വാങ്ങി
അപ്പിടി തിന്നുരസിക്കാനല്ലേ
അപ്പണി വേണ്ടയ്യാ... "

"അപ്പച്ചാ പല കണ്ണികളുള്ളോ-
രച്ചപ്പം തന്നാല്‍
അപ്പം നല്‍കാം കവിളില്‍ രണ്ടും
മുപ്പതു പൊന്നുമ്മ

അപ്പവും അപ്പൂപ്പനും

2008-01-17T16:10:00.000+05:30

അപ്പക്കാരയടുപ്പില്‍ വച്ചി-
ട്ടപ്പൂപ്പന്‍ ചൊല്ലി
അപ്പുക്കുട്ടാ ചുട്ടു തരാം ഞാ-
നപ്പം പത്തെണ്ണം
അപ്പം മീനുക്കുട്ടി ചിണുങ്ങീ
അപ്പൂപ്പാ വേണം
അപ്പുക്കുട്ടനെടുക്കും മുമ്പേ
അപ്പം പത്തെണ്ണം
അപ്പം കോരിയെടുക്കുന്നേര-
ത്തപ്പൂപ്പന്‍ ഞെട്ടി
പപ്പന്‍ പൂച്ചയെടുത്തു മറിച്ചി-
ട്ടപ്പം പത്തെണ്ണോം

പഴംപൊരി

2008-01-12T10:42:00.000+05:30

മഞ്ഞയുടുപ്പിട്ടരികിലിരിക്കും
കുഞ്ഞാലിപ്പയ്യാ
എണ്ണക്കടലില്‍ മുങ്ങിവരുമ്പോ-
ളെന്തൊരു മണമയ്യാ
ഉള്ളിലൊളിക്കും മധുരമൊരിത്തിരി
നുള്ളിയെടുത്തയ്യാ
നാലുമണിക്കതു നുണയും നേര-
ത്തെന്തൊരു രസമയ്യാ

പുതുവര്‍ഷം പുതുവര്‍ഷം

2008-01-02T10:02:00.000+05:30

ഭിത്തിയില്‍ നിന്നും പഴയതു മാറ്റി
പുത്തന്‍ കലണ്ടറിടുന്നച്ഛന്‍
താളുകളൊക്കെ മറിച്ചൊന്നു നോക്കി
താളത്തിലൊന്നു ചിരിച്ചമ്മ

"മാളൂ നീ ചൊല്ലു കലണ്ടറിനുള്ളില്‍
മോളേ നിനക്കേറെയിഷ്ടമെന്ത്‌?
ഓണമോ പൊന്നു വിഷുവോ വിളക്കോ
ഓമലേ നിന്‍റെ പിറന്നാളോ?"

"ഓണമല്ലമ്മേ വിഷുവുമല്ലമ്മേ
ഓമനയക്കം ചുവപ്പക്കം
എത്രയുണ്ടമ്മേ കലണ്ടറിനുള്ളില്‍
ചിത്തിരയക്കം ചുവപ്പക്കം?
അമ്മയ്ക്കുമച്ഛനുമൊപ്പമിരിക്കാന്
‍വേണമെനിക്കു ചുവപ്പക്കം...
കുഞ്ഞിച്ചിരിയൊരുപാടു പൊഴിക്കാന്‍
കുന്നോളം വേണം ചുവപ്പക്കം"

അച്ഛന്‍ ചിരിച്ചു പിന്നമ്മ ചിരിച്ചു
പുത്തന്‍ പുലരിയും പുഞ്ചിരിച്ചു
മാളുവും കൂടെ കുണുങ്ങിച്ചിരിച്ചു
"മോളേയുണ്ടേറെ ചുവപ്പക്കം"

വട്ടക്കയറില്‍ കുട്ടപ്പന്‍ ചേട്ടന്‍

2007-12-10T12:18:00.000+05:30

വട്ടക്കയറിന്നുള്ളില്‍ പെട്ടു
കുട്ടപ്പന്‍ചേട്ടന്‍
മൊട്ടത്തലയൊന്നൂരാനാവാ-
തൊട്ടു കുഴങ്ങിപ്പോയ്‌
കിട്ടന്‍ വന്നു കിഴുക്കു കൊടുത്തൂ
പെട്ടെന്നൂരിപ്പോയ്‌

(ബട്ടണ്‍ ഹോളില്‍ ബട്ടണ്‍.. അമര്‍ത്തുമ്പോള്‍ വെളിയില്‍)

ഇന്‍സ്‌റ്റ്രമെന്‍റു ബോക്സ്‌

2007-11-28T13:39:00.001+05:30

മുള്ളും വടിയും വട്ടക്കോലും
കൊള്ളും കുഞ്ഞിപ്പെട്ടിയിത്‌
പള്ളിക്കൂടത്തില്‍ പോകുമ്പോള്‍
അല്ലിക്കുട്ടിയെടുക്കുമിത്‌
നെല്ലിയ്ക്കായും ചാമ്പയ്ക്കായും
നുള്ളിയെടുത്തു നിറയ്ക്കുമിത്‌
തുള്ളിച്ചാടിപ്പോരും നേരം
തെല്ലുതുറന്നു തുളുമ്പുമത്‌
കള്ളച്ചിരിയൊടു ചുറ്റും നോക്കി
മെല്ലെയെടുത്തു തുടയ്ക്കുമത്‌

ചൊല്ലുക ചൊല്ലുക ചെല്ലക്കുട്ടാ
അല്ലിതുറക്കും പെട്ടിയിത്‌

ദീപാവലി

2007-11-08T11:03:00.000+05:30

കണ്ണുതെളിയട്ടെ ലോകം ചിരിക്കട്ടെ
കണ്ണാ ഈ പൂത്തിരി നീ കൊളുത്തൂ
ഇമ്മട്ടിലെല്ലാരും തുള്ളിത്തിമിര്‍ക്കട്ടെ
അമ്മൂ ഈ മത്താപ്പു നീ കൊളുത്തൂ
ഒറ്റമിഴിയും നനയാതിരിക്കട്ടെ
കുട്ടാ ഈ ലാത്തിരി നീ കൊളുത്തൂ
തമ്മില്‍ പൊരുതിത്തളരാതിരിക്കട്ടെ
തങ്കേ ഈ കമ്പിത്തിരികൊളുത്തൂ
ലോകം മുഴുവന്‍ വെളിച്ചം പടരട്ടെ
മാലൂ പടക്കത്തിരി കൊളുത്തൂ...
അന്ധകാരത്തിര മാറി മറയട്ടെ
അമ്മേ വിളക്കു കൊളുത്തി വക്കൂ....

എല്ലാവര്‍ക്കും ദീപാവലി ആശംസകള്‍....

തുമ്പിയും തമ്പിയും

2007-10-29T15:51:00.000+05:30

"തുമ്പീ തുമ്പീ തുമ്പപ്പൂവിന്‍
തുമ്പത്താടും പൂത്തുമ്പീ
തുള്ളിച്ചാടി വരുന്നോ മുറ്റ-
ത്തല്ലിക്കുളിരുണ്ടഴകുണ്ട്‌"

"തമ്പീ തമ്പീ നീയെന്‍ വാലിന്‍
തുമ്പില്‍ വള്ളിയുടക്കൂലേ
കല്ലുചുമക്കാന്‍ ചിറകില്‍ നുള്ളി
കള്ളാ നോവിച്ചീടില്ലേ?"

"തുമ്പീ തുമ്പീ ഞാനൊരു പാവം
തമ്പീ നിന്നെ നുള്ളില്ല
കല്ലു ചുമക്കാന്‍ ചൊല്ലത്തില്ല
മുല്ലപ്പൂവിലിരുത്തൂലോ"

കെട്ടിത്തൂക്കിയ തേങ്ങ കൈയാല്‍

2007-10-22T10:57:00.001+05:30

"കെട്ടിത്തൂക്കിയ തേങ്ങ കൈയാല്‍
ആട്ടിരസിക്കും കുട്ടൂസേ
കാലത്തിങ്ങനെ വേണ്ടാതീനം
കാട്ടുവതെന്തിനു കുട്ടൂസേ... "

" 'കുട്ടാ തേങ്ങ ആട്ടിയെടുത്താല്‍
കിട്ടും നല്ല വെളിച്ചെണ്ണ'
ഇന്നലെ മാമന്‍ ചൊല്ലിയതല്ലേ
എന്നിട്ടെവിടെ വെളിച്ചെണ്ണ?"

(തേങ്ങ "ആട്ടി"യാല്‍ വെളിച്ചെണ്ണ കിട്ടുമെന്ന് കേട്ട ഒരു കുസൃതിപ്പയ്യന്‍)

ചായമടിച്ചോരന്തിച്ചാരുത

2007-10-16T09:31:00.000+05:30

"ചായമടിച്ചോരന്തിച്ചാരുത
ചാരത്തെത്തിയപോലമ്മേ
കുങ്കുമ വര്‍ണ്ണം സ്വര്‍ണ്ണം മേലേ
കണ്ണുകുളിര്‍ക്കും കടുനീലം
മന്ദാരപ്പൂവിതളു പടര്‍ത്തും
മഞ്ഞയ്ക്കരികിലിളം ചോപ്പും
തെല്ലു കറുപ്പും മിന്നാമിന്നി-
ത്തെല്ലുതിളക്കത്തുള്ളികളും
ആകാശത്തീ അമ്പോറ്റിക്കുട
ആരുവിടര്‍ത്തിയതാണമ്മേ?"

"ഉണ്ണീ നിന്നുടെ ഉണ്ണിക്കണ്ണുകള്‍
ഉണ്ണട്ടേയെന്നോര്‍ത്തിട്ട്‌
ഈലൊകത്തിന്നമ്മ വിടര്‍ത്തിയ-
താണീ വര്‍ണ്ണപ്പൂക്കുടകള്‍"

ചിത്രത്തിനു കടപ്പാട്‌.. ഫ്ലിക്കര്‍ ബിഗ്‌ ബി (Big Bee) പൂമ്പാറ്റ

ചക്കരപ്പെട്ടി (മൊബൈല്‍ ഫോണ്‍)

2007-10-12T09:40:00.000+05:30

അക്കരെനിന്നെന്നെ അച്ഛന്‍ വിളിക്കുമ്പോള്‍
ഇക്കരെ പെട്ടി കിണുങ്ങമല്ലോ
പെട്ടിയെടുത്തു ഞാന്‍ ബട്ടണമര്‍ത്തുമ്പോള്‍
പൊട്ടിച്ചിരിച്ചു കുണുങ്ങുമല്ലോ
ഒത്തിരിയൊത്തിരി കാര്യങ്ങള്‍ ചൊല്ലുമ്പോള്‍
അച്ഛനോ കോരിത്തരിക്കുമല്ലോ
മുറ്റത്തെ മുല്ല വിരിഞ്ഞതും, പിച്ചകം
മൊട്ടിട്ട കാര്യവും ചൊല്ലുമല്ലോ
നന്ദിനിപ്പൈക്കുട്ടി ചാടിക്കളിച്ചതും
ചന്ദനം തൊട്ടതും ചൊല്ലുമല്ലോ
അമ്മയോടൊപ്പമിന്നങ്ങാടീ പോയതും
അമ്മൂമ്മ വന്നതും ചൊല്ലുമല്ലോ
അച്ഛന്‍റെയുമ്മകള്‍ കൊണ്ടുത്തരുമെന്‍റെ
പെട്ടീ നിനക്കതില്‍ പാതിയുമ്മ

പുള്ളിപ്പുതപ്പിന്‍റെയുള്ളിലുറങ്ങുന്നു

2007-10-10T12:01:00.000+05:30

പുള്ളിപ്പുതപ്പിന്‍റെയുള്ളിലുറങ്ങുന്നു
വെള്ളനിറമുള്ള വേലു മാമന്‍
അമ്മായി വന്നൊരു ഞെക്കു കൊടുത്തപ്പോള്‍
അമ്പോ പുറത്തേക്കു ചാടി മാമന്‍
നാരുകള്‍ തീര്‍ത്തോരു മെത്തപ്പുറത്തേക്കു
നേരേ മറിഞ്ഞു കിടന്നു മാമന്‍
കാലത്തേ തന്നൊരു കല്ലന്‍ ഗുഹയുടെ
ഉള്ളിലേക്കോടി മറഞ്ഞു മാമന്‍

(രാവിലെ ടൂത്ത്‌പേസ്റ്റ്‌ ബ്രഷിലേക്ക്‌)

ഞൊട്ടയും വെട്ടവും

2007-10-09T10:15:00.000+05:30

കുട്ടന്‍ വന്നൊരു ഞൊട്ടയതിട്ടു
പെട്ടെന്നെത്തീ വെട്ടം ദാ
കിട്ടന്‍ വന്നൊരു ഞൊട്ടയതിട്ടു
വെട്ടം പോയീ കഷ്ടം! ദാ

(സ്വിച്ചിടുമ്പോള്‍ ലൈറ്റ്‌ കത്തുന്നുന്നത്‌)

മുല്ലേ മുല്ലേ മുല്ലപ്പൂവേ

2007-10-04T09:56:00.001+05:30

"മുല്ലേ മുല്ലേ മുല്ലപ്പൂവേ
നുള്ളുതരാമോ ചെല്ലമണം"

"കല്ലേ കല്ലേ കവിളത്തിന്നൊരു
നുള്ളുതരും ഞാനോര്‍ത്തോണം"

"മുല്ലേ മുല്ലേ മുല്ലപ്പൂവേ
വെള്ളയുടുപ്പിന്നെന്തു മണം"

"കല്ലേ കല്ലേ കളിയാക്കല്ലേ
തല്ലുതരും ഞാനോര്‍ത്തോണം"

മുല്ല ചിരിച്ചൂ കല്ലു ചിരിച്ചൂ
നുള്ളിയെടുത്തൂ ചെല്ലമണം

നാലുമണിയ്ക്കു വിരിഞ്ഞ പൂവേ

2007-10-03T15:03:00.000+05:30

നാലുമണിയ്ക്കു വിരിഞ്ഞ പൂവേ
നല്ലോണമൊന്നു ചിരിച്ച പൂവേ
നാടോടിക്കാറ്റിന്‍റെ കാതിലെന്തോ
നാണം കുണുങ്ങിപ്പറഞ്ഞ പൂവേ
നിന്നെ ഞാനൊന്നു തഴുകീടുമ്പോള്‍
എന്തേ കവിളു തുടുത്തു പൂവേ
നല്ല ഞൊറിയുടുപ്പിട്ടു നില്‍ക്കും
നിന്നടുത്തോടി ഞാനെത്തിപൂവേ
ഒന്നു കൂടൊന്നു കുണുങ്ങു പൂവേ
കന്നിമഴപൊഴിയുന്ന മുമ്പേ

ചെന്തിങ്ങിന്‍ കൊമ്പത്തെ മച്ചിങ്ങായേ

2007-09-08T09:57:00.000+05:30

ചെന്തിങ്ങിന്‍ കൊമ്പത്തെ മച്ചിങ്ങായേ
എന്തേനീ ഇന്നു കൊഴിഞ്ഞിടാത്തേ
അന്തിയോളം കാത്തിരിക്കുന്നു ഞാന്‍
എന്തേ നീയിന്നു പൊഴിഞ്ഞിടാത്തേ

പ്ളാവില കൊണ്ടുള്ള കാളവണ്ടി
പാവമെനിക്കൊന്നുരുട്ടി വിടാന്‍
പമ്പരമുണ്ടാക്കിയങ്ങേതിലെ
തുമ്പിക്കു മുന്നില്‍ ഗമപറയാന്‍
പച്ചീര്‍ക്കില്‍ കൊണ്ടൊരു തയ്യല്‍ യന്ത്രം
അപ്പച്ചിക്കൊന്നു പണിഞ്ഞു നല്‍കാന്‍
അച്ചുക്കുരുന്നിന്‍റെയല്ലിക്കാതില്‍
കൊച്ചു കുണുക്കൊന്നു തൂക്കിയിടാന്‍

ഒന്നുപൊഴിയുമോ മച്ചിങ്ങായേ
ചെന്തെങ്കില്‍ കൊമ്പിലെ മച്ചിങ്ങായേ

ഓണം വന്നോണം വന്നോണം വന്നു

2007-08-18T14:01:00.000+05:30

ചിങ്ങനിലാവിന്നൊരുങ്ങി വന്നൂ
ചിത്തിരപ്പുഞ്ചിരി തൂവി നിന്നു
പാടവരമ്പും പവിഴമല്ലീം
പാവാടയിട്ടു കുണുങ്ങി നിന്നു
ഒത്തിരിപ്പൂമണം കൈയില്‍ വച്ചൂ
പാത്തും പതുങ്ങിയും കാറ്റു വന്നൂ
തുമ്പികള്‍ തുള്ളിക്കളിച്ചു വന്നൂ
തുമ്പക്കുടങ്ങള്‍ വിരിഞ്ഞു നിന്നൂ
പൊന്‍വെയില്‍ പൂക്കളമിട്ടു നിന്നൂ
പൊയ്കകളെങ്ങും നിറഞ്ഞു നിന്നു
കൈതയിലകള്‍ കരങ്ങള്‍ കൊട്ടി
കൈകൊട്ടിത്താളം പകര്‍ന്നു നിന്നു
തെങ്ങോല തുള്ളിച്ചിരിച്ചു നിന്നൂ
തുമ്പിലിളം കിളിയാടി നിന്നു
മാനം തെളിഞ്ഞു വിടര്‍ന്നു നിന്നു
മാവേലിത്തമ്പ്രാനെഴുന്നെള്ളുന്നു

അമ്മൂമ്മയുമ്മറത്തോടി വന്നൂ
"അമ്മൂ നീ കണ്ടോ പൊന്നോണം വന്നൂ"

പോസ്റ്റ്‌മാന്‍ അമ്മാവാ കത്തുണ്ടോ

2007-08-09T10:36:00.000+05:30

കാക്കിയുടുപ്പും കുഞ്ഞിച്ചിരിയും
കൊണ്ടുപറക്കുന്നമ്മാവ
സൈക്കിള്‍മണിയുമടിച്ചു കറങ്ങും
വൈക്കത്തുള്ളോരമ്മാവ
നാടൊട്ടുക്കീ കത്തു കൊടുക്കാ-
നോടിനടക്കുന്നമ്മാവാ
ഉമ്മറവാതിലങ്ങനിരിക്കു-
ന്നമ്മയ്ക്കിന്നൊരു കത്തുണ്ടോ
മുറ്റത്തിങ്ങനിരിക്കുന്നെന്നുടെ
ചിറ്റയ്ക്കിന്നൊരു കത്തുണ്ടോ
വെള്ളക്കാരുടെ നാട്ടില്‍ നിന്നും
വല്യമ്മയ്ക്കൊരു കത്തുണ്ടോ
കല്യാണത്തിനു നാളെണ്ണുന്നോ-
രിളയമ്മയ്ക്കൊരു കത്തുണ്ടോ
ചക്കരവാക്കുകളൊക്കെ നിറച്ചി-
ട്ടക്കയ്ക്കിന്നൊരു കത്തുണ്ടോ
ആകാശത്തെ വീട്ടില്‍ നിന്നെന്‍
അച്ഛനയച്ചൊരു കത്തുണ്ടോ
നക്ഷത്രത്തില്‍ മുത്തു പതിച്ചെന്‍
അച്ഛനയച്ചൊരു കത്തുണ്ടോ

ആകാശത്തിലെ അമ്പിളിമാമനെ

2007-08-07T11:21:00.001+05:30

ആകാശത്തിലെ അമ്പിളിമാമനെ
ആകത്തിളക്കിയതാരമ്മേ
ആവഴിയീവഴിയിമ്മിണിവെട്ടം
തൂവിയൊഴുക്കിയതാരമ്മെ
താരകമല്ലികപ്പൂവുകളിങ്ങനെ
വാരിവിതറിയതാരമ്മെ
താമരപ്പൊയ്ക പോലീരാവിനെ
താലോലമാട്ടുവതാരമ്മെ

ച്യൂയിംഗ്‌ ഗം

2007-08-03T16:13:00.000+05:30

മട്ടന്നൂരെ കുട്ടായി
എട്ടണ നല്‍കീ ചേലായി
തൊട്ടാലൊട്ടും മുട്ടായി
കുട്ടനു നല്‍കീ ചേട്ടായി
തൊട്ടു പൊളിച്ചാ മുട്ടായി
ഞൊട്ടിനുണഞ്ഞൂ കുട്ടായി
കെട്ടൂ മധുരം ചേട്ടായി
മുട്ടായി പുലിവാലായി
ഒട്ടിയിരുന്നൂ മുട്ടായി
കുട്ടായിയ്ക്കതു ബോറായി
പെട്ടന്നങ്ങനെ മുട്ടായി
ഞൊട്ടിയെറിഞ്ഞൂ കുട്ടായി
ഒട്ടിയിരുന്നൂ മുട്ടായി
കഷ്ടം കൈയില്‍ ചേട്ടായീ
എട്ടണ നല്‍കിയ മുട്ടായി
ചേട്ടായി പശപോലായി
ഞൊട്ടി നുണഞ്ഞൊരു കുട്ടായി
പൊട്ടിയ പട്ടം പോലായി

കൊങ്ങിണിപ്പൂവിണ്റ്റെ

2007-08-02T12:12:00.000+05:30

കൊങ്ങിണിപ്പൂവിണ്റ്റെ ചെല്ലത്തുമ്പില്‍
കിങ്ങിണിത്തുമ്പീ നീ വന്നിരുന്നു
മഞ്ഞയുടുപ്പും മണിച്ചിറകും
കുഞ്ഞിളം കൊമ്പും കുണുങ്ങിനില്‍പ്പും
അമ്മയൊരുക്കിയതാണോ നിന്നെ
ഇമ്മട്ടിലിത്രയും ചേലായ്‌ തന്നെ
അച്ഛനൊരുക്കിയതാണോ നിന്നെ
കൊച്ചുകളിത്തോഴിയായ പൊന്നേ
എന്നെയുംവിട്ടു നീ പോയാല്‍ പിന്നെ
തുമ്പീയെനിക്കു വിഷമം തന്നെ

കൊച്ചുചിരട്ടയില്‍ വച്ചെടുത്ത്‌ അച്ചുണ്ണി മണ്ണപ്പം ആറുചുട്ടു

2007-07-19T12:06:00.000+05:30

കൊച്ചുചിരട്ടയില്‍ വച്ചെടുത്ത്‌
അച്ചുണ്ണി മണ്ണപ്പം ആറുചുട്ടു
പച്ചിലത്തുമ്പൊന്നരിഞ്ഞെടുത്ത്‌
കൊച്ചമ്മിണി കറി മൂന്നു വച്ചു
വെള്ളത്തിലിത്തിരി പൂക്കളിട്ട്‌
മല്ലിക കിച്ചടി രണ്ടുവച്ചു
കപ്പത്തണ്ടൊന്നു മുറിച്ചെടുത്ത്‌
അപ്പൂട്ടനുപ്പേരി ചുട്ടെടുത്തു
ചീരയില നുള്ളി നുള്ളി വച്ച്‌
ബീരാനോ തോരനൊരുക്കി വച്ചു
നാലുകരിയില ചെന്നെടുത്ത്‌
ആലീസോ പപ്പടം കാച്ചി വച്ചു
പ്ളാവില കുത്തിയെടുത്തൊരുക്കി
പാര്‍വതി സദ്യവിളമ്പിവച്ചു
കാറ്റുവിശറിയും വീശിയെത്തി
കുട്ടികളങ്ങനെ ഉണ്ടിരുന്നു
കൊച്ചുമഴ ചന്നം പിന്നം വന്നു
കൊച്ചുങ്ങള്‍ കൈകള്‍ കഴുകി പിന്നെ..

(ചിത്രത്തിനു കടപ്പാട്‌ ചിതലിണ്റ്റെ പോസ്റ്റിനോട്‌ http://chithal.blogspot.com/2007/06/blog-post.html)

പച്ചയുടുപ്പിട്ട പിച്ചകപ്പെണ്ണിന്നു കൊച്ചരിപ്പൂവുകള്‍ നൂറണിഞ്ഞു

2007-07-16T11:30:00.000+05:30

പച്ചയുടുപ്പിട്ട പിച്ചകപ്പെണ്ണിന്നു
കൊച്ചരിപ്പൂവുകള്‍ നൂറണിഞ്ഞു
പിച്ചവച്ചെത്തിയ കാറ്റവള്‍ക്കോ പുതു
പിച്ചുകൊടുത്തു ചിരിച്ചുനിന്നു
പിന്നെക്കുണുങ്ങിയാ കാറ്റിനവളൊരു
കുന്നോളം പൂമണം നീട്ടിനിന്നു
പാതിയെനിക്കവന്‍ തന്നുവല്ലോ അതില്‍
പാതി ഞാനമ്മയ്ക്കു നല്‍കിയല്ലോ
പഞ്ചാരപ്പുഞ്ചിരിവാങ്ങി ഞാനിത്തിരി
പഞ്ചമിപ്പെണ്ണിനും നല്‍കിയല്ലോ
ചിറ്റചോദിച്ചപ്പോളിത്തിരി നല്‍കി ഞാന്‍
ചുറ്റിവരിഞ്ഞുമ്മ വാങ്ങിയല്ലോ
അമ്മൂമ്മ ചോദിച്ച നേരത്തു കൈകളില്‍
ഇമ്മിണിയില്ലാതെ തീര്‍ന്നുവല്ലോ
കാറ്റേ നീയെന്നിനിയെത്തുമെന്നമ്മൂമ്മ
കാത്തിരിപ്പേറെക്കഴിച്ചുവല്ലോ...

വരിവരിയായി കുനുകുഞ്ഞുറുമ്പുകള് ‍വരുന്നതു കാണമ്മേ..

2007-07-07T10:49:00.000+05:30

വരിവരിയായി കുനുകുഞ്ഞുറുമ്പുകള്
‍വരുന്നതു കാണമ്മേ..
ഇടമുറിയാതവരിയറയത്തുകൂടിങ്ങ-
ഴൊകുന്ന കാണമ്മേ
ഉറുമ്പിന്റെ അമ്പലനടയിലിന്നുത്സവ
ത്തിരുനാളാണോമ്മേ
സമരംചെയ്യുവാനവരൊരു ജാഥയായ്‌
പോവുകയാണോമ്മേ..
അവരുടെ പള്ളിക്കൂടത്തില്‍ രാവിലെ
മണിയടിച്ചോ അമ്മേ...
അവരുടെ സിനിമാശാലയില്‍ ടിക്കറ്റ്‌
കൊടുക്കാറായോമ്മേ
ആയിരമുറുമ്പുകള്‍ ഒരുവരിനിരയായ്‌
നീങ്ങുവതെന്തമ്മേ....

പുത്തനുടുപ്പിട്ടപ്പുക്കുട്ടന്‍ പുസ്തകമൊക്കെയെടുത്തിട്ട്‌

2007-06-26T11:15:00.000+05:30

പുത്തനുടുപ്പിട്ടപ്പുക്കുട്ടന്‍
പുസ്തകമൊക്കെയെടുത്തിട്ട്‌
കുടയും ബാഗും ചോറുനിറച്ചൊരു
കൂടും കൂടൊരു പുഞ്ചിരിയും
കൂട്ടിനു താഴെവീട്ടിലെ മീന-
ക്കുട്ടിപ്പെണ്ണും വാവാച്ചീം
അങ്ങേവീട്ടിലെ അന്തോണീ പി-
ന്നിങ്ങേവളവിലെ ബീരാനും
തമ്മില്‍ക്കൈകള്‍ കോര്‍ത്തും മഴയുടെ
താളം കുടയില്‍ വാങ്ങിച്ചും
നാട്ടുവിശേഷം ചൊല്ലിത്തമ്മില്‍
പാട്ടുകള്‍ പാടിക്കേള്‍പ്പിച്ചും
കൊച്ചുകടംകഥ ചോദിച്ചിടയില്‍
പിച്ചുകൊടുത്തു ചിരിച്ചിട്ടും
പള്ളിക്കൂടത്തില്‍പോകുന്നതു
പിള്ളച്ചേട്ടാ കണ്ടാട്ടെ
ചാറ്റല്‍ മഴയും കുഞ്ഞിക്കുളിരും
ചുറ്റിവരിഞ്ഞത്‌ കണ്ടാട്ടെ
കുഞ്ഞിപ്പൂവുകള്‍ പോലെചിരിക്കും
കുഞ്ഞുമുഖങ്ങള്‍ കണ്ടാട്ടെ.

മാനമിരുണ്ടുവരുന്നവല്ലോ മാണിക്യക്കുട്ടീ നീയെന്തു ചെയ്യും

2007-06-23T10:01:00.000+05:30

"മാനമിരുണ്ടുവരുന്നവല്ലോ
മാണിക്യക്കുട്ടീ നീയെന്തു ചെയ്യും?"
"തിണ്ണപ്പടിയിലനുജനൊത്ത്‌
കണ്ണുകുളിര്‍ക്കെ ഞാന്‍ കണ്ടിരിക്കും"

"കാറ്റു കുളിരുമായ്‌ വന്നുവല്ലോ
കാതരക്കുട്ടി നീ എന്തു ചെയ്യും?
"കണ്ണുമടച്ചാക്കുളിരെടുത്തെന്‍
കുഞ്ഞുമനസില്‍ പകര്‍ത്തിവക്കും"

"ചാറ്റല്‍മഴ പറന്നെത്തിയല്ലോ
ചക്കരക്കുട്ടീ നീയെന്തു ചെയ്യും?"
"കൈരണ്ടും നീട്ടി മഴയെടുത്തെന്‍
കണ്ണോരം തൊട്ടു നനച്ചെടുക്കും"

"ആലിപ്പഴം കൂടെ വന്നുവല്ലോ
അല്ലിക്കുരുന്നേ നീയെന്തു ചെയ്യും?"
"പാതിമുറ്റംവരെയോടിയോടി
പാവാടക്കുമ്പിളില്‍ വാരിവയ്ക്കും"

മുറ്റ്‌ത്തുവെള്ളം നിറഞ്ഞുവല്ലോ
മുത്തേകുരുന്നേ നീയെന്തു ചെയ്യും?
"വെള്ളംതെറിപ്പിച്ചു തുള്ളിയാടി
ഉള്ളംകുളിര്‍പ്പിച്ചിരിക്കുമല്ലോ"

"മെല്ലെ മഴ മറയുന്നുവല്ലോ
ചെല്ലക്കിടാവേ നീയെന്തു ചെയ്യും?"
"നാളെയുമെത്തണേയെന്നു ചൊല്ലി
വള്ളമുണ്ടാക്കിയിരിക്കുമല്ലോ"

തൊട്ടാവാടീ തൊട്ടാവാടീ തൊട്ടാല്‍ വാടുവതെന്താടീ

2007-06-19T09:11:00.001+05:30

തൊട്ടാവാടീ തൊട്ടാവാടീ
തോട്ടുവരമ്പില്‍ ശിങ്കാരീ
കമ്മലുമിട്ടു കുണുങ്ങിയിരിക്കണ
കാണാനെന്തൊരു ചേലാടീ
കാറ്റത്തൊന്നു ചിരിച്ചു രസിക്കണ
കാണാനെന്തൊരു ചേലാടീ
നോവിക്കാനരികത്തില്ലാരും
നുള്ളിയകറ്റാന്‍ മുള്ളുണ്ട്‌
എന്നിട്ടും ഞാനൊന്നു തൊടുമ്പോള്‍
എന്തേയിങ്ങനെ വാടുന്നു
നാണം കൊണ്ടോ പേടിയതുണ്ടോ
പെണ്ണേയെന്തിനു വാടുന്നു?
തൊട്ടാവാടീ തൊട്ടാവാടീ
തൊട്ടാല്‍ വാടുവതെന്താടീ
മുല്ലത്തൈയ്യെ കണ്ടുപടിക്കോള്‍-
ക്കില്ലീ നാണം ശിങ്കാരീെ
ചെല്ലത്തെറ്റിക്കൊട്ടും പേടിയ-
തില്ലതു കാണൂ ശിങ്കാരീ
തൊട്ടാവാടീ തൊട്ടാവാടീ
തൊട്ടാല്‍ വാടുവതെന്താടീ

വാലും പൊക്കി ചാടിനടക്കും വേലിക്കമ്പേലണ്ണാനേ

2007-06-18T13:56:00.001+05:30

വാലും പൊക്കി ചാടിനടക്കും
വേലിക്കമ്പേലണ്ണാനേ
വരയനുടുപ്പിട്ടൊന്നു ചിലക്കും
വികൃതിക്കുട്ടന്നണ്ണാനേ
ഒന്നുതൊടാന്‍ ഞാനോടിവരുമ്പോള്‍
മിന്നിയൊളിച്ചിട്ടൊടുവില്‍ നീ
മാവിന്‍ കൊമ്പത്തോടിക്കയറി
മാമ്പഴമങ്ങനെ തിന്നുമ്പോള്‍
താഴത്താശിച്ചാശിച്ചിങ്ങനെ നില്‍ക്കും
താരക്കുട്ടിക്കൊന്നു തരൂ
താമരമാലകളഞ്ചുതരാം പല-
മാതിരി മുത്തുകളേഴു തരാം
അങ്ങേക്കൊമ്പത്താടും മാമ്പഴ
മിങ്ങോട്ടേക്കൊന്നിട്ടേ താ..
കാറ്റും കേട്ടില്ലാരും കേട്ടില്ല-
ണ്ണാര്‍ക്കണ്ണ നീ കേള്‍ക്കൂ....
അങ്ങേക്കൊമ്പത്താടും മാമ്പഴ
മിങ്ങോട്ടേക്കൊന്നിട്ടേ താ..

ഒറ്റത്തൂണില്‍ കൂടാരം വട്ടത്തില്‍ ഒരു കൂടാരം

2007-06-15T11:06:00.000+05:30

ഒറ്റത്തൂണില്‍ കൂടാരം
വട്ടത്തില്‍ ഒരു കൂടാരം
എട്ടുകഴുക്കോല്‍ കൊണ്ടൊരു തച്ചന്‍
കെട്ടിയൊരുക്കിയ കൂടാരം
തൊട്ടാലുയരും കൂടാരം പി-
ന്നൊട്ടുചുരുങ്ങും കൂടാരം
കിട്ടുമ്മാവന്‍ തോളിലെടുത്തു
പിടിച്ചു നടക്കും കൂടാരം
കുട്ടിപ്പെണ്ണൊരു മഴയെത്തുമ്പോള്‍
ഓടിയൊളിയ്ക്കും കൂടാരം
കട്ടിവെയില്‍ച്ചൂടൊന്നു പതിച്ചാല്‍
കുട്ടനൊളിയ്ക്കും കൂടാരം

ചന്തുമ്മാവന്‍ സന്ധ്യകഴിഞ്ഞാല്‍ ചന്തയിലേക്കൊരു പോക്കുണ്ടേ

2007-06-07T14:49:00.000+05:30

ചന്തുമ്മാവന്‍ സന്ധ്യകഴിഞ്ഞാല്‍
ചന്തയിലേക്കൊരു പോക്കുണ്ടേ
ചന്തംകൂട്ടിമിനുക്കിയ മുഖവും
ചന്ദനവും ചെറുപുഞ്ചിരിയും
വെന്തുപുകഞ്ഞൊരു ബീഡിക്കുറ്റി-
ക്കുന്തുകൊടുക്കും മേല്‍മീശേം
മുന്തിയ കുടയൊരു കൈയില്‍, മുണ്ടിന്‍
കോന്തല മറ്റേക്കൈക്കുള്ളില്‍
കുന്തിച്ചങ്ങു കലുങ്കിലിരിക്കും
അന്തോണിക്കൊരു ചിരിയേകും
കൂന്താലിപ്പിടി തോളില്‍ വക്കും
ചന്തൂട്ടിയ്ക്കൊരു കൈ നല്‍കും
ചന്ദ്രന്‍പിള്ളെക്കാണും നേരം
"എന്തു വിശേഷം" ചോദിക്കും
പൊന്തക്കാട്ടില്‍ നിന്നുമെടുത്താ
പന്തു കിടാങ്ങള്‍ക്കേകീടും
ചന്തുമ്മാനെക്കണ്ടു കഴിഞ്ഞാല്‍
എന്തൊരു മോദമിതെല്ലാര്‍ക്കും
ചന്തുമ്മാനെപ്പോലായ്ത്തീരാന്‍
എന്തൊരു മോഹമിതെല്ലാര്‍ക്കും

ചിതറിക്കിടപ്പൂ നിന്‍ പൂവിരലടര്‍ത്തിയ മധുരം പൊതിഞ്ഞൊരാ മിട്ടായിക്കവറുകള്‍

2007-06-04T09:36:00.000+05:30

ചിതറിക്കിടപ്പൂ നിന്‍ പൂവിരലടര്‍ത്തിയ
മധുരം പൊതിഞ്ഞൊരാ മിട്ടായിക്കവറുകള്‍
പകുതിയുരച്ചു നീ മാറ്റിവച്ചൊരാ റബ്ബര്‍
ശകലങ്ങളും നിറം മങ്ങിയ വളപ്പൊട്ടും
നിരങ്ങിത്തളര്‍ന്നപ്പോള്‍ ചാടുകള്‍ പൊഴിഞ്ഞതാം
ഉരവണ്ടികള്‍, പൊട്ടിത്തകര്‍ന്ന ബലൂണുകള്‍
കോറി നീയുപേക്ഷിച്ച നോട്ടുബുക്കുകള്‍ പല
നിറങ്ങള്‍ നല്‍കിച്ചന്തം തികച്ച ചിത്രങ്ങള്‍ വാ-
ലെഴുതിച്ചിരിച്ചു നീ പൊട്ടിടാനെടുക്കുന്നോ-
രഴകിന്നരികിട്ട തുണ്ടുവാല്‍ക്കണ്ണാടികള്‍
മഴവില്‍ച്ചേലില്‍ നിന്നെ തിളക്കിത്തെളിയിച്ച
മിഴിവുതഴുകുന്ന മുടിക്കെട്ടുകള്‍ പിന്നെ
നിനവില്‍ നിനക്കിഷ്ടം പകര്‍ന്ന പളുങ്കുകള്‍
നനയും മിഴിതുടച്ചെടുക്കും കവിതകള്‍
നൃത്തമാടുവാന്‍ മുടിത്തിരുപ്പന്‍ കെട്ടും കരി
മുത്തുകള്‍ പിടിപ്പിച്ച ദുപ്പട്ടക്കഷണങ്ങള്‍

മാറ്റിവക്കുവാന്‍ വയ്യയിവയൊന്നുമേ ദു:ഖം
മാറ്റുതേടുമ്പോള്‍ വീണ്ടുമറിവൂ ഞാനാ സുഖം
പിണക്കം തടിച്ചിരുള്‍ വിതയ്ക്കും കുഞ്ഞു മുഖം
പിടയ്ക്കും നെഞ്ചം വീണ്ടും തേടുന്നാ സന്ധ്യാരാഗം..

കണ്ണടയ്ക്കുവാന്‍ വയ്യ കാണുന്നു വിയര്‍പ്പിണ്റ്റെ
പൊന്നുകള്‍ തിളങ്ങുന്ന നിന്നിളം കഴുത്തു ഞാന്‍
തെല്ലൊന്നു തുറക്കുമ്പോള്‍ കാണുന്നു കളിച്ചിരി
തെല്ലുകളൊരുക്കുന്ന തൈമുഖത്താരിന്നിതള്‍..

അറിയില്ലിനിപ്പണ്ടേപ്പോല്‍ മുനവരുമോ എന്‍
കുറിമാനങ്ങള്‍ക്കെല്ലാം, കൊണ്ടുപോയല്ലൊ എണ്റ്റെ
കല്ലുപെന്‍സിലും കരള്‍ വാടിയില്‍ നിറഞ്ഞൊരാ
വെള്ളിത്തണ്ടെല്ലികളും മടക്കയാത്രയില്‍ നീ...

(മാളവിക നാട്ടിലേക്കു മടങ്ങിയപ്പോള്‍....... )

ചെല്ലക്കാറ്റേ ചൊല്ലാമോ നീ ചെല്ലാത്തിടമുണ്ടോ മണ്ണില്‍

2007-06-02T13:43:00.001+05:30

ചെല്ലക്കാറ്റേ ചൊല്ലാമോ നീ
ചെല്ലാത്തിടമുണ്ടോ മണ്ണില്‍
ഇല്ലിക്കാട്ടില്‍ ചുള്ളിക്കാട്ടില്‍
നെല്ലിമരത്തില്‍ തുമ്പൊന്നില്‍
അല്ലിപ്പൂവും ചൂടിയിരിക്കും
കള്ളിപ്പാലപ്പൊന്‍ കൊമ്പില്‍
ഉള്ളംകാളും വെള്ളച്ചാട്ടം
തുള്ളിമദിക്കും ചുഴിയൊന്നില്‍
വെള്ളിമുകില്‍ത്തിര നീന്തിയടുക്കും
വെള്ളാരംകുന്നറ്റത്തില്‍
വെള്ളം നീലച്ചേലയിലോ തിര
തല്ലിത്തുള്ളും കടലൊന്നില്‍
ചെല്ലക്കാറ്റേ ചൊല്ലാമോ നീ
ചെല്ലാത്തിടമുണ്ടോ മണ്ണില്‍

കാലില്ലാത്തൊരു ചുണ്ടനെലി നീളത്തില്‍ വാലുള്ളൊരെലി

2007-05-12T11:59:00.000+05:30

കാലില്ലാത്തൊരു ചുണ്ടനെലി
നീളത്തില്‍ വാലുള്ളൊരെലി
നീളുമിടയ്ക്കു ചുരുങ്ങിവരും
മാളത്തില്‍ ചുരുളുന്നൊരെലി
മിന്നാമിന്നിവെളിച്ചത്തില്‍
ചോന്നുതുടുത്തമിടുക്കനെലി
തീനും കുടിയും വേണ്ടാത്ത
ചീനി കരണ്ടാ പാവമെലി
ആരും കെണിയില്‍ കൊല്ലാത്ത
കരിനിറമുള്ളൊരു കുഞ്ഞനെലി

അമ്പലത്തില്‍ പോകാനമ്മ വിളിച്ചപ്പൊള്‍ അമ്പോറ്റിയമ്മുവിനെന്തൊരുക്കം

2007-05-11T09:03:00.000+05:30

അമ്പലത്തില്‍ പോകാനമ്മ വിളിച്ചപ്പൊള്‍
അമ്പോറ്റിയമ്മുവിനെന്തൊരുക്കം
അമ്പിളിപ്പൊന്‍ മുഖം തെല്ലുമിനുക്കുന്നു
അമ്പോ ചുവന്നൊരു പൊട്ടിടുന്നു
രണ്ടായ്‌ പിരിച്ചു മുടിയൊന്നൊരുക്കുന്നു
വണ്ടിണക്കണ്ണില്‍ മഷിയിടുന്നു
കൊച്ചുകവിളില്‍ കറുത്ത കുത്തേകുന്നു
കുപ്പിവളകള്‍ നിറച്ചിടുന്നു
ചെറ്റു തലചരിച്ചൊന്നു നോക്കീടുന്നു
നെറ്റിയില്‍ തെല്ലു മുടിയിടുന്നു
നീലപ്പാവാട ഞൊറിയൊരുക്കീടുന്നു
ചേലൊത്ത മാലയണിഞ്ഞീടുന്നു
തൂവാലയൊന്നു തിരഞ്ഞെടുത്തീടുന്നു
തൂമ തികഞ്ഞോന്നു ചോദിക്കുന്നു
ഒക്കെയും കണ്ടു ചിരിച്ചു നിന്നമ്മ പി-
ന്നൊക്കത്തു വച്ചു പുണര്‍ന്നിടുന്നു
"അമ്മു അടുത്തു നീയിങ്ങനെ നില്‍ക്കുമ്പോള്‍
അമ്പലോം അമ്പോറ്റീം വേറെന്തിനു.... "

മാളുവും റിക്ഷാമാമനും

2007-05-09T09:16:00.000+05:30

ഉച്ചയ്ക്കു നിത്യവും സ്കൂളില്‍ നിന്നെത്തിക്കും
പച്ചയുടുപ്പിട്ട റിക്ഷാമാമന്‍
വച്ചുചവിട്ടി വിയര്‍പ്പു തുടച്ചുകൊ-
ണ്ടൊത്തിരിക്കാര്യങ്ങള്‍ ചൊല്ലുന്നവന്‍
ഏറെത്തളര്‍ന്നും മെലിഞ്ഞും ചുമച്ചുകൊ-
ണ്ടോരോരോ പാട്ടുകള്‍ പാടുന്നവന്‍
അമ്മകൊടുത്ത പഴമൊന്നു നീട്ടുമ്പോള്‍
ഉമ്മകൊടുത്തുപൊതിഞ്ഞെടുക്കും
"മാളൂനെപ്പോലൊരു മോളുണ്ടെനിക്കുമെ"-
ന്നീറന്‍ മിഴികള്‍ തുടച്ചുനില്‍ക്കും
അന്നൊരുനാളവള്‍ ചോദിച്ചീയങ്കിളി-
നെന്നുമൊരേയുടുപ്പെന്തിതച്ഛാ...
എറെമുഷിഞ്ഞു കുടുക്കുകള്‍ പോയിട്ടും
വേറെയൊരെണ്ണമിടാത്തതെന്താ?

"പാവങ്ങളാണവരാര്‍ക്കുമേ വേണ്ടാത്തോറ്‍
പാവകള്‍ പോലെ ചലിക്കുന്നവര്‍
ചോറിനുവേണ്ടി ചവിട്ടിത്തളരുന്നോറ്‍
ചേരിയില്‍ ജീവിതം വാട്ടുന്നവര്‍
ഒട്ടുംതികയില്ല നമ്മള്‍ കൊടുക്കുന്ന
തുട്ടുകള്‍ വേറൊരുടുപ്പു വാങ്ങാന്‍"

മെല്ലെവിതുമ്പിപ്പറഞ്ഞവള്‍ "നല്‍കണം
നല്ലോരുടുപ്പ്‌ വിഷുദിനത്തില്‍
മാമനു ചേരും നിറവും വലിപ്പവും
ഓമനയോര്‍ത്തു പറഞ്ഞുതന്നു.
പുള്ളിയുടുപ്പുമായ്‌ പോയവള്‍ പൊന്‍ വിഷു
വെള്ളിയുദിച്ച ദിനത്തിലന്ന്
വിങ്ങിക്കരഞ്ഞുമടങ്ങിവന്നു മുഖം
മങ്ങിത്തുടുത്തു ചുവന്നു കൊണ്ട്‌

"എങ്ങോ മറഞ്ഞെണ്റ്റെ മാമന്‍ ഇനിമേലില്‍
ഇങ്ങുവരില്ലെന്നു ചൊല്ലിയൊരാള്‍.. "
പുള്ളിയുടുപ്പുമാറൊടൊന്നു ചേര്‍ത്തു നീര്
‍ത്തുള്ളികള്‍ തുള്ളും മിഴിതുടച്ചു...

അന്നുമുതലവളെല്ലാവഴിയിലും
കണ്ണുനനച്ചു തിരക്കിനിന്നു
പാലൈസുകാരണ്റ്റെ സൈക്കിള്‍ മണിയിലും
പണ്ടത്തെമാമനെ തേടി നിന്നു...

മോളിക്കുട്ടിയുറക്കമുണര്‍ന്നൊരു മുല്ലപ്പൂമണമേറ്റിട്ടു

2007-05-07T16:27:00.000+05:30

മോളിക്കുട്ടിയുറക്കമുണര്‍ന്നൊരു
മുല്ലപ്പൂമണമേറ്റിട്ടു
മൂളിപ്പാട്ടും പാടിത്തെക്കേ
മൂലയ്ക്കോടും നേരത്ത്‌
മുറ്റത്തങ്ങേക്കോണില്‍ ദേഹം
മൊത്തോം മുത്തുമണിഞ്ഞിട്ടു
മഞ്ഞിന്‍ തുള്ളിക്കുളിരിന്നുള്ളില്‍
മുങ്ങിയിരുന്നു ചിരിച്ചിട്ട്‌
മാടിവിളിച്ചു കൊതിപ്പിച്ചല്ലൊ
മോടിയിലിന്നൊരു ചാമ്പത്തൈ

"മോളിക്കുട്ടീ പുളിയും മധുരോം
മേളിക്കുന്നൊരു ചാമ്പക്ക
മേളില്‍ വരയൂം കൈയെത്തുന്നേല്‍
മേടിച്ചോ നീ ചാമ്പയ്ക്ക
മറ്റൊരു നാട്ടില്‍ കിട്ടത്തില്ല
മറ്റെങ്ങും ഞാന്‍ വളരൂലാ..
മോളിക്കുട്ടീ മധുരം വേണേല്‍
മേളില്‍ക്കേറിക്കൂടിക്കോ"

മോഹംകൂടി ചാടിത്തുള്ളി
മോളിക്കുട്ടി തളര്‍ന്നപ്പോള്‍
മിന്നിയണഞ്ഞൊരു തെക്കന്‍ കാറ്റ്‌
മെല്ലെയടര്‍ത്തീ ചാമ്പയ്ക്ക
മഞ്ഞപ്പാവടപ്പൂങ്കുമ്പിള്‍
മുഴുവന്‍ നല്‍കീ ചാമ്പയ്ക്ക

മോളിക്കുട്ടി മദിച്ചു കുതിച്ചു
മൂളിമറഞ്ഞൂ പൂങ്കാറ്റും..

കന്നിനിലാവിന്നു കിന്നരി വച്ചൊരു കുന്നുമിറങ്ങി വരുന്ന കണ്ടോ

2007-05-04T10:53:00.000+05:30

കന്നിനിലാവിന്നു കിന്നരി വച്ചൊരു
കുന്നുമിറങ്ങി വരുന്ന കണ്ടോ
കുഞ്ഞരിപ്പൂവിണ്റ്റെയല്ലിക്കവിളത്തൊ-
രുമ്മകൊടുത്തു ചിരിച്ച കണ്ടോ
മുറ്റത്തു വെള്ളിപ്പരമ്പുവിരിച്ചൊരു
നൃത്തം ചവിട്ടിരസിച്ച കണ്ടോ
തുള്ളിച്ചിരിക്കുന്ന മുല്ലപ്പൂപെണ്ണിനെ
നുള്ളിച്ചെവിക്കു പിടിച്ചകണ്ടോ
മിന്നാമിനുങ്ങിണ്റ്റെ മുന്നിലായ്‌ നിന്നൊരു
കണ്ണുമടച്ചുകളിച്ച കണ്ടോ
താഴെക്കിണറ്റിലിറങ്ങിയാ വെള്ളത്തിന്‍
ആഴമളന്നുതിരിച്ച കണ്ടോ
പച്ചയുടുപ്പിട്ട കൊച്ചുതുളസിക്കു
പുത്തന്‍ വളകള്‍ കൊടുത്തകണ്ടോ
മെല്ലെയുറങ്ങും പശുക്കിടാവിന്‍ മിഴി
തെല്ലുതടവിക്കൊടുത്തകണ്ടോ
അങ്ങേപ്പറമ്പിലെ ചെമ്പകപ്പൂമണം
കിങ്ങിണിക്കൈയില്‍ പകര്‍ന്ന കണ്ടോ
ഇങ്ങേപ്പറമ്പിലെ തൈവാഴച്ചെക്കനെ
ഇങ്ങനെ വാരിപ്പുണര്‍ന്ന കണ്ടോ
ഉമ്മറത്തങ്ങനിരിക്കുമെന്‍ കൈയിലും
ഇമ്മിണിവെട്ടം പകര്‍ന്ന കണ്ടോ

പാവമീ കന്നിനിലാവിന്‍ കുസൃതിയെ
ആവോളം കണ്ടൊന്നിരിക്കട്ടെ ഞാന്‍..

തെങ്ങോലത്തുമ്പത്തു പൂങ്കുരുവി കിങ്ങിണിക്കൂടൊന്നൊരുക്കിയല്ലൊ

2007-04-28T14:38:00.000+05:30

തെങ്ങോലത്തുമ്പത്തു പൂങ്കുരുവി
കിങ്ങിണിക്കൂടൊന്നൊരുക്കിയല്ലൊ
പാറിനടന്നേറെ നാരെടുത്ത്‌
പാടവരമ്പിലെ നാമ്പെടുത്ത്‌
കുഞ്ഞിക്കിളിവാതില്‍ മുന്നെയൊന്ന്
കുഞ്ഞിനിരിക്കുവാന്‍ മഞ്ചമൊന്ന്
മണ്ണുകുഴച്ചൊരലുക്കു വച്ച്‌
മിന്നാമിനുങ്ങിനെ കൊണ്ടുവച്ച്‌
രാവിലിണയ്ക്കു വെളിച്ചമേകാന്‍
ആരും പറഞ്ഞു കൊടുത്തിടാതെ..
അമ്മക്കുരുവിക്കു മുട്ടയിടാന്‍
ഇമ്മട്ടിലുള്ളില്‍ കുഴി മെനഞ്ഞ്‌
മഞ്ഞും മഴയും നനഞ്ഞിടാതെ
കുഞ്ഞിക്കുരുവിക്കുടുംബമിതാ
കുഞ്ഞിളം കാറ്റത്തൊന്നാടിയാടി
മഞ്ഞനിലാവൊത്തൊന്നാടിയാടി

തൊട്ടിലുപോലുള്ളാ കൂട്ടിനുള്ളില്
‍തൊട്ടിരിക്കന്‍ വരൂ കൂട്ടുകാരെ... ...

വേനലവധിയ്ക്കു നാടൊന്നു കാണുവാന്‍ ...........

2007-04-23T10:30:00.000+05:30

വേനലവധിയ്ക്കു നാടൊന്നു കാണുവാന്‍
വേഗമൊരുങ്ങെന്റെ യമ്മേയൊന്ന്
ഉള്ളംതുടിക്കുകയാണെന്റെ യാമഴ
ത്തുള്ളിയോടൊത്തൊന്നു തുള്ളിയാടാന്‍
കണ്ണിമാങ്ങകടിച്ചൊന്നു രുചിക്കുവാന്‍
ഉണ്ണിയോടൊത്തൊന്നു കൂട്ടുകൂടാന്‍
മാവിന്‍ ചുവട്ടിലിരുന്നു കളിക്കുവാന്‍
മഞ്ചാടിച്ചന്തം നുകര്‍ന്നിരിക്കാന്‍
ഓലപ്പന്തൊന്നു മെനയുവാന്‍ രാവിലെ
ചേലക്കുയിലിന്റെ പാട്ടുകേള്‍ക്കാന്‍
മണ്ണപ്പംചുട്ടിലത്തുമ്പില്‍ വിളമ്പുവാന്‍
മന്ദാരപ്പൂവിറുത്തുമ്മവയ്ക്കാന്‍
അച്ഛനോടൊത്തുപുലര്‍ച്ചയില്‍ തന്നെയെന്‍
അച്ചന്‍ കോവില്‍പ്പുഴ നീന്തിയേറാന്‍
കായല്‍ത്തിരക്കുളിര്‍കാറ്റേറ്റു നില്‍ക്കുവാന്‍
ആയത്തിലൂയലൊന്നാടിയാടാന്‍
ചാറ്റല്‍മഴയുടെ ചാരത്തിരുന്നൊരു
പാട്ടുരസിച്ചുല്‍ കുളിരണിയാന്‍
മുറ്റത്തെവാഴത്തളിര്‍ക്കൂമ്പിന്നുള്ളിലാ-
യിറ്റുന്ന തേന്‍ രുചിച്ചുല്ലസിക്കാന്‍
ഓലേഞ്ഞാലിക്കിളിക്കൂടൊന്നു കാണുവാന്‍
ഞാലിപ്പൂവന്‍ പഴച്ചേലു കാണാന്‍
പാടവരമ്പില്‍ ചിരിച്ചുനില്‍ക്കും തൊട്ടാ-
വാടിയെത്തൊട്ടുകളിപറയാന്‍
കൊച്ചുകടാലാവണക്കിന്റെ തണ്ടൊടി-
ച്ചൊട്ടുകുമിളപറത്തി നില്‍ക്കാന്‍
അപ്പൂപ്പന്‍ താടിയോടൊത്തൊന്നു തുള്ളുവാന്‍
അപ്പച്ചിചൊല്ലും കഥകള്‍ കേള്‍ക്കാന്‍
കോളാമ്പിപ്പൂവിന്റെ മഞ്ഞാട കണ്ടിട്ടു
കോലോത്തെ റാണി നീ യെന്നു ചൊല്ലാന്‍
മറ്റെങ്ങും കാണാത്ത ചാമ്പക്ക തിന്നുവാന്‍
മുറ്റത്തെ മുല്ലയെ തൊട്ടിരിക്കാന്‍
പച്ചീര്‍ക്കില്‍ത്തുമ്പിലായ്‌ മച്ചിങ്ങ കോര്‍ത്തൊരു
കൊച്ചുതയ്യല്‍ യന്ത്രം തീര്‍ത്തെടുക്കാന്‍

കണ്ണുപൊത്തിത്തുറന്നമ്മ കണികാണിച്ചു

2007-04-14T13:41:00.000+05:30

കണ്ണുപൊത്തിത്തുറന്നമ്മ കണികാണിച്ചു- സ്വര്‍ണ്ണ
വര്‍ണ്ണമേറും കണിക്കൊന്നക്കുടന്ന പൂവും - മഞ്ഞ
ത്തുകില്‍ച്ചന്തം പൊഴിച്ചൂറിച്ചിരിച്ചിരിക്കും - കണ്ണ-
ന്നടുത്തിരിന്നുലയുന്ന മണിദീപവും - മെല്ലെ
പുലര്‍ക്കാറ്റിന്‍ തളിര്‍ക്കൈകള്‍ തഴുകിനില്‍ക്കും - ചെറു
മലര്‍നിര പുണരുന്ന പുകച്ചുരുളും - തങ്ക
ത്താലമൊന്നില്‍ തിളങ്ങുന്ന നാണയത്തുട്ടും - മധു
വോലുമേതോ നാട്ടുമാവിന്‍ കനിയും പിന്നെ - മുറി
ത്തേങ്ങരണ്ടും തിളങ്ങും വാല്‍കണ്ണാടയൊന്നും - പുതു
തൊങ്ങലിട്ടും നവലോകം വിടര്‍ന്നീടുവാന്‍ - തിരു
പാദപത്മം പണിയുന്നേ കമലക്കണ്ണാ - ചോര
വീണുകണ്ണീര്‍ കുതിരാത്ത നാളെകള്‍ താ നീ- നിണ്റ്റെ
വേണുനാദം പടരുന്ന ജീവിതങ്ങള്‍ താ - പൊരി
വെയിലേറ്റു വാടാത്ത ബാലലോകം താ - ഇളം
കുയില്‍പ്പാട്ടില്‍ തലയാട്ടും പുലരികള്‍ താ - ആരും
വിശന്നേറെ വലയാത്തോരുച്ചകളും താ - ആരും
വിശന്നേറെ വലയാത്തോരുച്ചകളൂം താ..........

ചാടിച്ചാടി തെങ്ങില്‍ കയറി ചാരിയിരിക്കും കുഞ്ഞായി

2007-04-06T16:47:00.000+05:30

ചാടിച്ചാടി തെങ്ങില്‍ കയറി
ചാരിയിരിക്കും കുഞ്ഞായി
മേളം പോലാ തെങ്ങും കൂമ്പില്‍
താളമടിക്കും കുഞ്ഞായി
ചാടിയിറങ്ങും നേരത്തരയില്‍
കൂട കുലുങ്ങും ചേലായി
ചാടിയിറങ്ങി തോമ്മിച്ചാനെ
മാടിവിളിക്കും കുഞ്ഞായി
കൂടതുറന്നിട്ടൊന്നര നാഴി
ക്കള്ളു കുടിക്കും തൊമ്മായി
നാലരനാഴീം കൂടെയിറക്കി
നാലാം കാലേല്‍ തൊമ്മായി
പമ്മി പമ്മി നടന്നേ പോയി
തൊമ്മിച്ചന്‍ ദാ വീലായി
വീട്ടില്‍ചെന്നിട്ടന്നച്ചേച്ചി-
ക്കെട്ടിടി നല്‍കീ ഹാലായി
മുട്ടനുളക്കയെടുത്തുകൊടുത്തു
മുട്ടിനൊരെണ്ണം ചേട്ടായി

"തെങ്ങില്‍ക്കേറി കള്ളും ചെത്തി
തുള്ളിയിറങ്ങും കുഞ്ഞായി
മത്തുപിടിച്ചു നശിക്കും ലോകം
നിര്‍ത്തുകയിപ്പണി ചങ്ങാതി. "

കൂടുതല്‍ കല്ലുപെന്‍സില്‍ കവിതകള്‍ ഇവിടെ ചൊല്ലിക്കേള്‍ക്കാം
Kallupencil Kavithakal Online.....!

2007-04-04T08:50:00.000+05:30

കല്ലുപെന്‍സില്‍ ബ്ലോഗിലെ മൂന്നു കവിതകള്‍ ഓഡിയോ രൂപത്തില്‍. ഓര്‍ക്കസറ്റ്രേഷന്‍ ഒന്നും ഇല്ലാതെ വെറുതെ ഒരു തമാശ. വലിയ നിലവാരം പ്രതീക്ഷിക്കല്ലെ...

ആലാപനം : ലക്ഷ്മി എസ്. നായര്‍

Kallupen2.mp3

അല്ലെങ്കില്‍ ഈ ലിങ്കിലേക്കു പോവുക....(അഭിപ്രായം അറിയിക്കുമല്ലോ)
--------------------------------------
http://www.esnips.com/doc/53540749-e339-4d52-9d72-3663a74dbe46/Kallupen2
--------------------------------------

രാധയും അച്ഛനും ആകാശവും

2007-04-03T15:07:00.000+05:30

രാവിലീയാകാശ വിസ്മയം കാണുവാന്‍
രാധയും അച്ഛനുമൊത്തുചേര്‍ന്നു
എണ്ണിയാല്‍ തീരാത്ത താരങ്ങളാദൂര
വിണ്ണിലായ്‌ മിന്നുന്ന കണ്ടു നിന്നു
പാലാഴിപോലലയാടുന്ന വാനിലായ്‌
ആലോലമോടും മുകില്‍നിരയില്‍
ചിമ്മിയും മങ്ങിയും കണ്ണുകവര്‍ന്നും കൊ-
ണ്ടമ്മട്ടിലെത്രയോ നക്ഷത്രങ്ങള്‍

"എത്രയുണ്ടച്ഛായിതെത്രദൂരത്തച്ഛാ
യെത്രയുണ്ടാവുമതിന്നപ്പുറം"

"കോടാനുകോടികള്‍ പിന്നെയും കോടികള്‍
ഓടിനടക്കും പ്രപഞ്ചമിതില്‍
നമ്മുടെപോലെത്ര സൂര്യന്‍മാര്‍, ഭൂമികള്‍
നമ്മളെപ്പോലെത്ര ജീവിതങ്ങള്‍
കുന്നുകള്‍, പൊയ്കകള്‍ കന്നിനിലാവുകള്‍
കുന്നിമണികള്‍ പെറുക്കും പൈതല്‍
അച്ഛനെക്കാത്തു പടിക്കലിരിക്കുന്ന
കൊച്ചുകിടാവുകള്‍ അമ്പലങ്ങള്‍
മഞ്ഞുപൊഴിയും പുലരികള്‍ മന്ദാര
മഞ്ഞപടരുന്ന പൂവാടികള്‍
പള്ളികള്‍ പള്ളിയില്‍ പോവുന്നോരമ്മമാര്‍
പള്ളിക്കൂടങ്ങള്‍ കളിക്കളങ്ങള്‍
ഒക്കെയുമുണ്ടാകാമൊട്ടേറെയാക്കൊച്ചു
നക്ഷത്രലോകത്തു നമ്മെപ്പോലെ"

അച്ഛണ്റ്റെ വാക്കുകള്‍ കേട്ടു രാധ യിളം
കൊച്ചുമിഴികള്‍ വിടര്‍ത്തിനിന്നു
നക്ഷത്രമായിരമക്കണ്ണില്‍ കണ്ടച്ഛന്‍
നെഞ്ചോടു ചേര്‍ത്തു പിടിച്ചു നിന്നു..

കാലത്തെഴുന്നേറ്റു മൂവാണ്ടന്‍ മാങ്കൊമ്പില്‍

2007-03-31T10:22:00.000+05:30

കാലത്തെഴുന്നേറ്റു മൂവാണ്ടന്‍ മാങ്കൊമ്പില്‍
ചേലൊത്തു പാടുന്ന പൂങ്കുയിലേ
ചാരത്തു ഞാനുമിരുന്നോട്ടെ നിന്‍ കുളിറ്‍
നാദത്തെയുള്ളില്‍നിറച്ചെടുക്കാന്‍
മാന്തളില്‍തിന്നിട്ടോ പൂന്തേന്‍ നുകര്‍ന്നിട്ടോ
മുന്തിരിച്ചാറു കുടിച്ചിട്ടാണൊ
അമ്പാടിക്കണ്ണന്നമ്പോറ്റിപ്പൂങ്കുഴല്‍
അന്‍പോടെ നിന്‍ കൈയില്‍ തന്നിട്ടാണോ
ആരുംകൊതിക്കുന്നൊരീണവുമായ്‌ നീയെ-
ന്നാരാമ റാണിയായ്‌ മാറിയല്ലോ
പാലുമായമ്മ വിളിച്ചാലുമമ്മൂമ്മ
പായസം നീട്ടിക്കൊതിപ്പിച്ചാലും
നീയൊന്നു പാടിയാല്‍ വേറേതോ ലോകത്തില്‍
നീന്തി ഞാനെല്ലാം മറക്കുമല്ലോ
പോവല്ലേ നീയെങ്ങും പൂങ്കുയിലേ നിന-
ക്കാവുന്നതെല്ലാം ഞാന്‍ വാങ്ങിയേകാം
എന്നുമെന്‍ മുറ്റത്തു വന്നു നീ പാടിയാല്‍
പൊന്നും പവിഴവും വാങ്ങിയേകാം

മലയാളക്കരയെന്തുണ്ട്‌

2007-03-29T16:50:00.000+05:30

മലയാളക്കരയെന്തുണ്ട്‌
മലയോരപ്പൂങ്കാറ്റുണ്ട്‌
മഞ്ഞുപൊതിഞ്ഞുകുണുങ്ങിയിരിക്കും
മന്ദാരപ്പൂങ്കാടുണ്ട്‌
കണ്ണുകവര്‍ന്നുകുലുങ്ങിയിരിക്കും
കന്നിനിലാവിന്‍ കുളിരുണ്ട്‌
കൈതവരമ്പില്‍ പൂവുണ്ട്‌
കൈതവമില്ലാപ്പുഴയുണ്ട്‌
പുഴയുടെ കൈയില്‍ പുതുമഴ നല്‍കിയ
പൊന്നോളപ്പൂഞ്ചെപ്പുണ്ട്‌
ചെപ്പിന്നുള്ളില്‍ മുത്തുണ്ട്‌ ആ
മുത്തിനൊത്തിരിയഴകുണ്ട്‌
കളിചിരിപറയാനോടിവരുന്നൊരു
കല്യാണിപ്പൂങ്കിളീയുണ്ട്‌
കിളിയുടെ ചുണ്ടില്‍ പാടം നല്‍കിയ
കിലുകിലെ മിന്നും നെല്ലുണ്ട്‌
നാലുമണിക്കു വിടര്‍ന്നു ചിരിക്കും
നാടന്‍ ചെടിയുടെ പൂവുണ്ട്‌
നാലുവെളുപ്പിനുണര്‍ന്നു വിളിക്കും
വാലന്‍ കോഴിച്ചേലുണ്ട്‌
അത്തപ്പൂക്കളമുറ്റത്തമ്പിളി
യെത്തിമിനുക്കും രാവുണ്ട്‌
ഒത്തിരിയൊത്തിരിമധുരം നിറയും
ചിത്തിരവാഴക്കൂമ്പുണ്ട്‌
പിച്ചിവിടര്‍ന്നുമണക്കും മുറ്റ-
ത്തച്ചിങ്ങായുടെ നിരയുണ്ട്‌
തെങ്ങോലപ്പൂന്തുമ്പത്താടും
കുഞ്ഞാറ്റപ്പൂങ്കൂടുണ്ട്‌
വെള്ളിപുതച്ചകരിമ്പിന്‍ പാടം
തുള്ളിയുതിര്‍ക്കും കുളിരുണ്ട്‌
വെള്ളിത്തണ്ടുമണക്കും തൊടിയില്‍
വെള്ളാരപ്പൊന്‍ കല്ലുണ്ട്‌

പട്ടുനൂല്‍ കൊട്ടാരത്തിലെ രാക്ഷസ രാജാവ്‌

2007-03-23T13:11:00.000+05:30

പട്ടുനൂല്‍കൊണ്ടൊരു കൊട്ടാരമുണ്ടാക്കി
പട്ടാണി രാജ്യത്തെ രാജരാജന്‍
രാക്ഷസരാജാവിരുന്നു നടുക്കൊരു
രാജസിംഹാസനമൊന്നിലായി
വാളും പരിചയും വില്ലുമില്ലാ കൂടെ
ആളാരുമില്ല പരിചരിക്കാന്‍
കൊട്ടാരം കാണുവാനെത്തുന്ന കൂട്ടരെ
കെട്ടിവരിഞ്ഞുമുറുക്കിയിട്ടു
ഒട്ടുവിശക്കുമ്പോള്‍ കൂട്ടത്തിലൊന്നിനെ
വെട്ടിവിഴുങ്ങിയഹങ്കരിച്ചു
വട്ടുണ്ണി വണ്ടുമൊരിക്കല്‍ കടന്നല്ലൊ
വട്ടത്തിലുള്ളൊരാ കൊട്ടാരത്തില്‍
പെട്ടന്നുരാജാവു വന്നു കടും പാടു
പെട്ടവന്‍ രക്ഷപെട്ടോടിയോടി
കുന്നില്‍മുകളിലെ പക്ഷിരാജാവിനെ
ചെന്നുകണ്ടെല്ലാം പറഞ്ഞുവല്ലോ
എത്തിയുടന്‍പക്ഷിരാജനാ ദുഷ്ടനെ
കൊത്തിയെടുത്തുപറന്നകന്നു..

ആലീസും അമ്മച്ചിയും തമ്മില്‍ ഒരു കൊച്ചുവര്‍ത്തമാനം

2007-03-21T11:55:00.000+05:30

"പള്ളീപ്പൊയിത്തുള്ളിവരുന്നൊരു
പുള്ളിയുടുപ്പിട്ടാലീസേ
പള്ളിക്കൂടമടച്ചില്ലേ പൂ-
പ്പള്ളിലെന്നാ പോവുന്നേ
വെള്ളക്കാരുടെനാട്ടില്‍ നിന്നും
വല്ല്യപ്പച്ചന്‍ വന്നീലേ
വെള്ളക്കാറില്‍ അപ്പയ്ക്കൊപ്പം
വേളാംകണ്ണീല്‍ പോണില്ലേ
കള്ളച്ചിരിയും കൈവളയും കൊ-
ണ്ടുള്ളന്നൂരില്‍ പോണില്ലേ
വള്ളത്തേലൊന്നാടിയിരിക്കാന്‍
വെള്ളങ്കടവില്‍ പോണില്ലേ
ഉള്ളുതുറന്നിട്ടെന്തായൊന്നും
കള്ളിപ്പെണ്ണേ മിണ്ടാത്തെ"

"വെള്ളിത്തോടത്തുമ്പുകുലുക്കി
വെള്ളം കോരുന്നമ്മച്ചീ
വെള്ളേപ്പത്തിനുകൂട്ടാനെന്താ
ഉള്ളിക്കറിയോ പപ്പാസോ?"

ചായക്കടയിലെ അനിയത്തീ..

2007-03-17T10:50:00.000+05:30

ചായക്കടയിലെ ചാരം പുരണ്ടേറെ
ചാരുത മങ്ങിയ പെണ്‍കുരുന്നേ
പത്തുവയസിലെ കൊച്ചു കുസൃതിയെ
പാത്രം കഴുകിക്കളയുവോളെ
പേരുചോദിക്കുമ്പോഴൊന്നും പറയാതെ
പേരക്കാപുഞ്ചിരി നല്‍കുന്നോളെ
വാടിയ നെറ്റിയില്‍ പാറുന്ന ചെമ്മുടി
മാടിയൊതുക്കി ഞാന്‍ തന്നിടട്ടെ
ഒട്ടുവിയര്‍പ്പുമണിപടരുമിളം
നെറ്റിയില്‍ ഞാനൊരു പൊട്ടിടട്ടെ
സ്വപ്നങ്ങളില്ലാത്ത കുഞ്ഞുമിഴികളില്‍
സ്വല്‍പ്പം മഷിയെടുത്തൊന്നിടട്ടെ
കൊച്ചുമുറിവുകള്‍ വീണനിന്‍ കൈകളില്‍
കുപ്പിവളകളണിയിക്കട്ടെ
പിന്നിയൊരീപഴഞ്ചേലഴിച്ചൊരു
കിന്നരിപ്പാവാട നല്‍കിടട്ടെ
അക്ഷരംവീഴാത്ത കുഞ്ഞുമനസില്‍ ഞാന്‍
അച്ഛനും അമ്മയും കോറിടട്ടെ
ഒന്നും പറയാതെ കൈയിലെ ചാരത്താല്‍
പിന്നെയുമെന്തോ വരയ്ക്കുന്നു നീ
പുസ്തകമേന്തി കളിച്ചു നീങ്ങുമൊരു
കുട്ടിയെ നോക്കിച്ചിരിക്കുന്നു നീ
കാത്തിരിക്കാമൊരുജന്‍മവും കൂടി നീ
കൊച്ചനുജത്തിയായെത്തുമെങ്കില്‍....
മുറ്റത്തെമുല്ലയും പിച്ചിയും മന്ദാര
മൊട്ടും നിനക്കായി കാത്തുവക്കാം

പൌലോസുചേട്ടണ്റ്റെ കൈയിലെ പാലൈസ്

2007-03-16T09:56:00.000+05:30

(കുഞ്ഞുങ്ങളെ അടുത്തുപോവല്ലെ . അതു മിന്നാമിന്നിയല്ല)

പൌലോസു ചേട്ടണ്റ്റെ ചുണ്ടിലുണ്ടേ
പാലൈസു പോലുരു മിന്നാമിന്നി
ഒന്നു നുണയുമ്പോള്‍ മിന്നുമല്ലോ
പിന്നെയിടാക്കൊന്നു മങ്ങുമല്ലൊ
ചാരിയിരുന്നു പുകയെടുക്കും
ചാരമിടക്കൊന്നു ഞൊട്ടിയിടും
ചിന്തിച്ചിരുന്നു വളയമൊന്നു
ചുണ്ടുവളച്ചുപുറത്തുവിടും
മഞ്ഞയരഞ്ഞാണമെത്തുവോളം
ആഞ്ഞു വലിച്ചതില്‍ നോക്കുമല്ലോ
കുറ്റികെടുത്തിവലിച്ചെറിഞ്ഞു
കുത്തിയിരുന്നു ചുമയ്ക്കുമല്ലൊ
പൊന്നേയീ ശീലം കളയൂവെന്ന്
പൊന്നമ്മച്ചേച്ചി കയര്‍ക്കുമല്ലൊ
ഇന്നൂടെയുള്ളെടീയെന്നു ചൊല്ലി
ഒന്നൂടെയൊന്നു കൊളുത്തുമല്ലൊ
ചെല്ലക്കിടാങ്ങളെ മാറിനില്‍ക്കൂ
ഉള്ളില്‍ വിഷപ്പുകയേറ്റിടാതെ..

പേന തലതിരിച്ചാല്‍ തെളിയാത്തതെന്താ അച്ഛാ?

2007-03-13T16:30:00.000+05:30

അച്ഛനൊരു പുത്തന്‍ പേന കൊടുത്തപ്പോള്‍
അക്കച്ചിപ്പെണ്ണുകുതിച്ചെടുത്തു
കുത്തിയും കോറിയുമോരൊന്നെഴുതിയ
കൊച്ചുമിടുക്കി ചിരിച്ചിരുന്നു
അപ്പു അനുജണ്റ്റെ മൊട്ടത്തലയും പി-
ന്നപ്പൂപ്പന്‍ തണ്റ്റെ നരച്ച താടീം
കപ്പക്കിഴങ്ങിണ്റ്റെ ചിത്രവും പൂക്കളു-
മൊപ്പം വരച്ചു ചിരിച്ചിരുന്നു
അമ്മയെന്നച്ഛനെന്നമ്മൂമ്മയെന്നും പി-
ന്നമ്മിക്കല്ലെന്നുമെഴുതിനിന്നു
പാടവും നെല്ലും വരമ്പും അരികിലെ
മാടക്കിളിയെയും കോറിനിന്നു
അച്ഛനോടായവള്‍ ചോദിച്ചു പിന്നൊരു
നിശ്ചലമാക്കുന്ന കുഞ്ഞുചോദ്യം
"ഏറെയുയറ്‍ത്തിപ്പിടിച്ച കടലാസില്‍
കോറിവരയ്ക്കുവാന്‍ നോക്കിയപ്പോള്‍
ഒന്നും തെളിയുന്നില്ലേന്തിതു കാരണം
ഒന്നു പറയാമോ ആരെങ്കിലും"

"കുഞ്ഞേനിന്‍ തൂലികത്തുമ്പില്‍ മഷിത്തുള്ളി
കൊണ്ടുവരുന്നതു ഭൂഗുരുത്വം
ചെറ്റുതലതിരിച്ചൊന്നു പിടിക്കുകില്‍
അറ്റത്തതെങ്ങനെയെത്തി നില്‍ക്കും

എന്നെയുംനിന്നെയും എല്ലാത്തിനേയുമീ
മണ്ണിലായ്‌ താങ്ങുന്ന ഭൂഗുരുത്വം
മണ്ണുമറന്നു മദിക്കല്ലെ ഓമലേ
മങ്ങുമീ പേനപോല്‍ നമ്മളെല്ലാം... "

അമ്മയടുക്കളക്കോണിലിരുന്നിത്ര കണ്ണുതുടക്കുന്നതതെന്തിനച്ഛാ

2007-03-12T14:55:00.000+05:30

അമ്മയടുക്കളക്കോണിലിരുന്നിത്ര
കണ്ണുതുടക്കുന്നതതെന്തിനച്ഛാ
ഉള്ളിയരിഞ്ഞുതളര്‍ന്നതിനാലാണോ
ഉള്ളം ഉരുകി തിളച്ചാതാണൊ
മുറ്റമടിച്ചുകിതച്ചതിനാലാണോ
മുട്ടൊന്നു പൊള്ളിത്തുടുത്തിട്ടാണോ
കുന്നുപോല്‍പാത്രം കഴുകിത്തുടക്കുമ്പോള്‍
കുഞ്ഞുകൈ തെല്ലു മുറിഞ്ഞിട്ടാണോ
കണ്ണിമാങ്ങയുപ്പു തെല്ലുപുരട്ടുമ്പോള്‍
ഉണ്ണിബാല്യത്തെയിന്നോര്‍ത്തിട്ടാണോ
വെള്ളം നനച്ചു തറതുടയ്ക്കുന്നേരം
തെല്ലുകാല്‍തെറ്റിമറിഞ്ഞിട്ടാണൊ
ആകെമൂടുന്നൊരാ കുപ്പായച്ചൂടിലെ
ആറാത്തചൂടില്‍തളര്‍ന്നതാണോ
ചാരംകരിവീണ മേനിയില്‍ പണ്ടത്തെ
ചാരുത ഉള്ളിലൊന്നോര്‍ത്തതാണോ
ചോദിച്ചു ഞാന്‍ പലവട്ടവും, ഉത്തരം
സീതേ നീയിപ്പോഴറിയേണ്ടെന്ന്
കുഞ്ഞാണു നീ വളരുമ്പൊളറിഞ്ഞിടും
പെണ്ണായ നൊമ്പരമൊക്കെയെന്ന്
അച്ഛനുംകൂടൊന്നു ചെല്ലുമോ അമ്മതന്‍
കൊച്ചുപണികളെ പങ്കുവക്കാന്‍
മോറിയും നീറിയുമോടിയും കണ്ണുനീറ്‍
വാരിയും അമ്മ തളരുകല്ലേ?

നീലാണ്ടേട്ടാ നീലാണ്ടേട്ടാ കാലത്തേതന്നെങ്ങോട്ടാ?

2007-03-10T09:24:00.000+05:30

"നീലാണ്ടേട്ടാ നീലാണ്ടേട്ടാ
കാലത്തേതന്നെങ്ങോട്ടാ?
നാലാം മുണ്ടും തോളിലുമിട്ടീ-
കാലത്തേ തന്നെങ്ങോട്ടാ?
ചേലായ്‌ ചീകിയ മുടിയും കൈയില്‍
ശീലക്കുടയും കൈലേസും
നീലാണ്ടേട്ടാ നീലാണ്ടേട്ടാ
കാലത്തേതന്നെങ്ങോട്ടാ?"

"കോലപ്പായിന്നല്ലേ നമ്മുടെ
നീലിപ്പെണ്ണിനു കല്യാണം
നാലാളെത്തുന്നിടമല്ലേടേ
ചേലായ്‌ തന്നെ പോവണ്ടെ?
നീലിപ്പെണ്ണിന്‍ കല്യാണത്തിനു
നാലപ്പാട്ടെ ഊണല്ലെ
പാലക്കാടന്‍ പുത്തരികാണും
ആലത്തൂരന്നവിയേലും
ഓലന്‍ തോരന്‍ പുളിശ്ശേരി പി-
ന്നാലങ്കോടന്നച്ചാറും
പാലട നെയ്യും പപ്പടവും ഹാ
കോലപ്പാ ഇന്നുല്‍സവമാ "

"നീലാണ്ടേട്ടാ പോയാട്ടേയെന്‍
കോലന്‍ നാവു നനക്കാതെ... "

അയ്യൊ ഇതെന്തൊരു കലപ്പ (സിപ്‌)

2007-03-09T08:53:00.000+05:30

മുണ്ടകന്‍ പാടമുഴുതുമറിക്കുവാന്‍
വണ്ടന്നൂറ്‍ നിന്നു കലപ്പയെത്തി
തണ്ടു വലിക്കുവാന്‍ കൂറ്റനാം കാളകള്‍
രണ്ടെണ്ണം മുന്നിലൊരുങ്ങിനിന്നു
കണ്ടമുഴുതപ്പോളയ്യയ്യോ കാണുന്നു
രണ്ടായ മണ്ണിതാ ഒന്നിക്കുന്നു
കണ്ടവര്‍ കണ്ടവര്‍ ചുണ്ടത്തു കൈവച്ചു
കണ്ടോയിതെന്തൊരു മായമയ്യൊ
രണ്ടായ്‌ പിളരേണ്ട മണ്ണു കലപ്പായാല്‍
വീണ്ടുമൊന്നാവുന്നു തമ്പുരാനെ

(രണ്ടു വിരലാല്‍ കുപ്പായത്തിലെ സിപ്‌ വലിച്ചിടുന്നത്‌)

പാപ്പീ പാപ്പീ ചൊല്ലാമൊയീ പീപ്പിയിതെങ്ങനെയുണ്ടാക്കി

2007-03-08T10:52:00.000+05:30

"പാപ്പീ പാപ്പീ ചൊല്ലാമൊയീ
പീപ്പിയിതെങ്ങനെയുണ്ടാക്കി
പപ്പാവാങ്ങിത്തന്നതുപോല-
ല്ലപ്പീയെന്തൊരു ശബ്ദമെടാ"

"അന്തോണീയൊരു പീപ്പിക്കായി-
ട്ടെന്തിനു ചില്ലറ കളയേണം?
തെങ്ങോലക്കാല്‍ മെല്ലെയടര്‍ത്തീ-
ട്ടിങ്ങനെയൊന്നുചുരുട്ടിയെട്‌
കൊച്ചീറ്‍ക്കില്‍ത്തുണ്ടറ്റത്തിങ്ങനെ
കുത്തിയിറക്കിയൊരുക്കിയെട്‌
കുഞ്ഞറ്റത്തൊരു ഞെക്കുകൊടുത്താല്‍
കുഞ്ഞേ നിന്നുടെ പീപ്പി റെഡി

പപ്പായോടുപറഞ്ഞേക്കൂ ഇനി
പീപ്പിക്കാശിനു മുട്ടായി... "

കഷ്ടം കഷ്ടം പട്ടിക തലയില്‍ ഒട്ടും കയറുന്നില്ലല്ലൊ

2007-03-07T09:15:00.000+05:30

"കഷ്ടം കഷ്ടം പട്ടിക തലയില്‍
ഒട്ടും കയറുന്നില്ലല്ലൊ
ആറെട്ടേഴേട്ടറുപത്തെട്ടെ-
ന്നറിയാതോതിപ്പോകുന്നേ
സാറേ സാറേ ഞങ്ങടെ കാര്യം
സീറോയായിപ്പോകുന്നേ
തൊട്ടുഗുണിക്കാന്‍ യന്ത്രമൊരെണ്ണം
തൊട്ടരികത്തായുള്ളപ്പോള്‍
എന്തിനു സാറെ വെറുതേയിങ്ങനെ
തൊന്തരവോരോന്നുണ്ടാക്കി
ഈരെട്ടുരുപത്തെട്ടെന്നേയീ
പൊട്ടന്‍ തലയില്‍ വരുവുള്ളൂ
പട്ടികപടിയെട ലുട്ടാപ്പീ നീ
ചുട്ടടി നല്‍കും കുട്ടന്‍ സാറ്‍"

"ആരാടാ ആ പുറകില്ലെ ബഞ്ചില്‍
ആരവമുണ്ടാക്കീടുന്നു
പട്ടിക ചൊല്ലാന്‍ പറ്റുന്നില്ലേല്‍
വീട്ടില്‍ പോകട കുട്ടപ്പാ"

"കുട്ടന്‍ സാറെ ഞാനല്ലിവനാ
മൊട്ടത്തലയന്‍ കുട്ടായീ
പട്ടികയൊന്നു പറഞ്ഞുകൊടുത്താല്‍
പൊട്ടാസൊന്നു തരാമെന്ന്"

കത്തിക്കെടുന്നൊരീ മിന്നാമിന്നി

2007-03-06T16:05:00.001+05:30

ആരുകൊളുത്തിവിടുന്നതാണീരാവില്‍
ആരും കൊതിക്കുമീ മിന്നാമിന്നി
തുള്ളിവെളിച്ചത്തിന്‍ മാലയണിഞ്ഞല്ലൊ
മുല്ലയും പിച്ചിയും ചെമ്പകവും
ഒന്നു തൊടാന്‍ ഞാനടുത്തുചെല്ലുമ്പഴൊ
മിന്നിമറഞ്ഞതു പോകുന്നല്ലൊ
വിണ്ണിലെ നക്ഷത്രമെല്ലാമൊരുദിനം
മണ്ണിലേക്കെത്തിയാതാണോ അച്ഛാ
പാവം കുരുവിക്കു കൂട്ടില്‍ തെളിക്കുവാന്‍
ദൈവം കൊടുക്കുന്നതാണൊ അമ്മെ
ഒന്നുപിടിച്ചു തരുമോ എനിക്കൊരു
കുഞ്ഞിക്കളിവീടൊരുക്കു വക്കാന്‍
ക്രിസ്തുമസ്സെത്തുമ്പോള്‍ വര്‍ണ്ണമരമൊന്നില്‍
കെട്ടിക്കൊളുത്തിയലങ്കരിക്കാന്‍
മിട്ടായി നൂറെണ്ണം തന്നാലും ഞാന്‍ നാളെ
കുട്ടായിക്കൊന്നും കൊടുക്കില്ലിതില്‍
അത്രമേലിഷ്ടമാണമ്മെ ഇടയ്ക്കിടെ
കത്തിക്കെടുന്നൊരീ മിന്നാമിന്നി

പാവം പാവം പാവം ഞാനൊരു പാവക്കായാണേ

2007-03-05T09:57:00.000+05:30

പാവം പാവം പാവം ഞാനൊരു
പാവക്കായാണേ
ഒത്തിരിയൊത്തിരു മുള്ളുണ്ടേലും
ഒട്ടും കുത്തില്ലേ
ഉള്ളില്‍നിറയെ കയ്പ്പാണേലും
തുള്ളീം വിഷമില്ലേ
പണ്ടൊരുചേട്ടന്‍ പൂങ്കുരുകുത്തി
പന്തലതിട്ടപ്പോള്‍
വെള്ളോം വളവും ചുറ്റിക്കയറാന്‍
വള്ളീം തന്നപ്പോള്‍
പച്ചപ്പിട്ടു വളര്‍ന്നൂ എന്നെ
പെറ്റിട്ടെന്നമ്മ
കടലാസുംകൊണ്ടാരോ കുമ്പിള്‍
കുപ്പായം തന്നു
ചന്തത്തില്‍ പൂന്തൊട്ടിലിലിട്ടൊരു
ചന്തയിലെത്തിച്ചേ
ചന്തുമ്മാവന്‍ ചില്ലറ നല്‍കി
സഞ്ചിയിലാക്കീലോ
എണ്ണയിലിട്ടു വറുത്തു തണുപ്പി-
ച്ചെന്നെ തിന്നോളൂ
കിച്ചടിയാക്കിച്ചൂടാറാതെന്‍
കൊച്ചേ തിന്നോളൂ
നന്നായ്‌ വളരാനെല്ലാമറിയാ-
നെന്നെത്തിന്നോളൂ

എന്തും കാണാമെന്തും ചെയ്യാം എന്തൊരുപെട്ടിയിതെണ്റ്റമ്മോ

2007-03-03T12:34:00.000+05:30

അമ്മുക്കുട്ടിക്കമ്മാവന്നൊരു
കുഞ്ഞിപ്പെട്ടികൊടുത്തല്ലൊ
എന്തും കാണാമെന്തും ചെയ്യാം
എന്തൊരുപെട്ടിയിതെണ്റ്റമ്മോ
ഏഴാം കടലിന്നക്കരെയുള്ളോ-
രേട്ടായിക്കൊരു കത്തെഴുതാം
ഏഴുവെളുപ്പിനു മുമ്പേ തന്നെ
എല്ലാ പത്രോം വായിക്കാം
കല്ലുപുരക്കല്‍ കുഞ്ഞിപ്പെണ്ണില്‍
കല്യാണക്കഥ കണ്ടീടാം
കാതുകുളിര്‍ക്കെ പാട്ടുകള്‍ കേള്‍ക്കാം
കമ്മല്‍ വളകള്‍ വാങ്ങിക്കാം
എന്തും കാണാമെന്തും ചെയ്യാം
എന്തൊരുപെട്ടിയിതെണ്റ്റമ്മോ
നാരങ്ങാട്ടെ നാണുമ്മാനെ
നേരില്‍ കണ്ടൊരു ചിരിതൂകാം
പച്ച നിറത്തില്‍ മഞ്ഞകലറ്‍ത്തി
പുത്തന്‍ പടമൊന്നുണ്ടാക്കാം
പുത്തന്‍ ലിപിയില്‍ പഴയതരത്തില്‍
പുസ്തകമൊത്തിരിയുണ്ടാക്കാം
ആകാശത്തു കറങ്ങും ചേച്ചി-
ക്കരികില്‍ ചെന്നൊരു പൂ നല്‍കാം
ഈലോകത്തെയുരുട്ടിയെടുത്തി-
ട്ടിങ്ങനെവച്ചിതിലാരമ്മോ
എന്തും കാണാമെന്തും ചെയ്യാം
എന്തൊരുപെട്ടിയിതെണ്റ്റമ്മോ

പത്രോസേട്ടനും മത്തായിച്ചനും

2007-03-01T09:12:00.000+05:30

പത്രോസേട്ടന്‍ പത്രോസേട്ടന്‍
പത്രക്കാരന്‍ ചേട്ടന്‍
പത്രക്കെട്ടും വച്ചു ചവിട്ടും
പത്തുവെളുപ്പാന്‍ കാലം
മത്തീമയലേം വിറ്റു നടക്കും
മത്തായിച്ചന്‍ കണ്ടു

"പത്രോസേയെന്‍ പത്രോസേ പുതു
വാര്‍ത്തകളെന്താ ചൊല്ലൂ"

"മുത്തങ്ങായില്‍ മുന്തിരിപോലൊരു
മത്തങ്ങാക്കുല കണ്ടു
പത്തിരിവില്‍ക്കും പരമുച്ചേട്ടനു
പത്തരലക്ഷം കിട്ടി
ചാത്തന്നൂരൊരു പോത്തന്‍ കടുവ
പത്തായത്തില്‍ ചത്തു

പുത്തന്‍ വാര്‍ത്തകളിനിയും വേണേല്‍
പത്രം വാങ്ങിനിവര്‍ത്ത്‌"

പൂത്തിരിപോലൊരു പുഞ്ചിരി നല്‍കി
പത്രോസേട്ടന്‍ പോയി
"മത്തിക്കിന്നു വിലക്കുറവാണേ"
മത്തായിച്ചന്‍ കൂവി

ആലീസിനൊരു കടലാസു വിമാനം വേണം

2007-02-28T13:54:00.000+05:30

വെള്ളക്കടലാസു നുള്ളിയെടുത്തൊരു
വള്ളമുണ്ടാക്കി വിരുതനുണ്ണി
വെള്ളത്തിലിട്ടതു നീങ്ങുന്ന കണ്ടപ്പൊ
തുള്ളിച്ചിരിച്ചു മിടുക്കന്‍ അമ്പി
കല്ലിട്ടൊരോളത്താല്‍ പിന്നെയും നീങ്ങുന്ന
കണ്ടു കുതിച്ചു മദിച്ചുണ്ണൂണ്ണി
കൂനനുറുമ്പിനെ കാശുവാങ്ങാതുള്ളില്‍
കേറ്റിയിരുത്തിമിടുക്കിയല്ലി
പച്ചപ്പുല്ലൊന്നു പറിച്ചെടുത്തറ്റത്തു
കുത്തിവച്ചൊന്നു ചിരിച്ചമ്മിണി
തുമ്പപ്പൂകൈയാലിറുത്തെടുത്തക്കരെ
തുമ്പിക്കു നല്‍കാന്‍ പറഞ്ഞമ്പിളി
അങ്ങു ദൂരെ കടലമ്മയ്ക്കു നല്‍കുവാന്‍
ഉമ്മനിറയെ കൊടുത്തു നീലി
വര്‍ണ്ണക്കടലാസു നീട്ടി കുഞ്ഞാലീസൊ-
ന്നുണ്ണിയെ മാടി വിളിച്ചു നിന്നു
"ഉണ്ണീയെനിക്കു വിമാനം നീ നല്‍കുമോ
വിണ്ണിന്നുമപ്പുറം പോന്നൊരെണ്ണം
ആകാശക്കോണിലിരുക്കുമെന്നമ്മയ്ക്കൊ-
രായിരം ഉമ്മ കൊടുത്തുവിടാന്‍.... "

പഞ്ചമിയും മഞ്ചാടിയും

2007-02-26T13:27:00.000+05:30

മഞ്ചാടിപ്പൂങ്കുരു നുള്ളിപ്പെറുക്കുമ്പോള്‍
പഞ്ചമിപ്പൈതലാള്‍ പുഞ്ചിരിച്ചു
അഞ്ചിടം കൈയിലും അഞ്ചുന്ന പാവാട
തുഞ്ചത്തെ കുമ്പിളില്‍ അന്‍പത്തഞ്ചും
വാരിയെടുത്തു വരുമ്പോളയലത്തെ
വാര്യത്തെയമ്മുവെ കണ്ടുവല്ലൊ
"അഞ്ചെണ്ണം താ നീ യെനിക്കെണ്റ്റെ പഞ്ചമി "
കൊഞ്ചിക്കുഴഞ്ഞവള്‍ ചോദിച്ചല്ലൊ
"ഇന്നലെ ഞാന്‍ നിനക്കൊത്തിരി മുല്ലപ്പൂ
ഒന്നും പറയാതെ തന്നതല്ലെ? "

പഞ്ചാര മിട്ടായി മൂന്നെണ്ണം വാങ്ങിയി-
ട്ടഞ്ചാറു മഞ്ചാടി നല്‍കിയവള്‍

ചിത്തിര മുറ്റത്തെ വാഴക്കൂമ്പേ

2007-02-23T10:04:00.000+05:30

ചിത്തിര മുറ്റത്തെ വാഴക്കൂമ്പേ
ഇത്തിരിത്തേന്‍ തുള്ളി താ നീ കൂമ്പേ
അണ്ണാറക്കണ്ണനിറങ്ങും മുമ്പേ
അമ്മയുറക്കമുണരും മുമ്പേ
അന്നക്കിളി വന്നെടുക്കും മുമ്പേ
അമ്മൂമ്മ മുറ്റമടിക്കും മുമ്പേ
പൂത്തുമ്പിതുള്ളിവരുന്ന മുമ്പേ
പുത്തന്‍ മഴപൊഴിയുന്ന മുമ്പേ
പൊന്നിതളുള്ളില്‍ പൊതിയുമന്‍പാം
തേന്‍ തുള്ളിയെന്തു മധുരമമ്പോ
ചിത്തിര മുറ്റത്തെ വാഴക്കൂമ്പേ
ഇത്തിരിത്തേന്‍ തുള്ളി താ നീ കൂമ്പേ

കന്യാകുമാരിക്കടല്‍ത്തിരകണ്ടെണ്റ്റെ

2007-02-22T13:43:00.000+05:30

"കന്യാകുമാരിക്കടല്‍ത്തിരകണ്ടെണ്റ്റെ
കുഞ്ഞേ നിന്‍ കണ്ണുനനഞ്ഞതെന്തേ?
അന്തിച്ചുവപ്പു തുടിക്കുന്ന കണ്ടെണ്റ്റെ
അല്ലീ മിഴികള്‍ നിറഞ്ഞതെന്തേ?
പൊന്നു സൂര്യന്‍ മുങ്ങിത്താഴുന്ന കണ്ടിട്ടോ
പൊന്നേ മടങ്ങണമെന്നോറ്‍ത്തിട്ടോ?
ചിപ്പി പോരാഞ്ഞിട്ടോ മാല പോരാഞ്ഞിട്ടോ
കുപ്പിവളകള്‍തികയാഞ്ഞിട്ടോ?
കന്യാകുമാരിക്കടല്‍ത്തിരകണ്ടെണ്റ്റെ
കുഞ്ഞേ നിന്‍ കണ്ണുനനഞ്ഞതെന്തേ?"

"അങ്ങൊരുചേച്ചിനില്‍ക്കുന്നതു കാണമ്മെ
വിങ്ങിക്കരഞ്ഞുകരഞ്ഞുകൊണ്ട്‌
ശംഖുംവളകളും നൂറുണ്ട്‌ കൈകളില്‍
സങ്കടം മാത്രമാക്കണ്ണുകളില്‍
എത്രനിറമുള്ള മാലയുണ്ടാക്കൈയില്‍
എന്നിട്ടുമെന്തേ കരഞ്ഞുചേച്ചി... "

"കൊച്ചു മാലവില്‍ക്കും പെണ്‍കിടാവണവള്‍
അഛനെ തേടുകയായിരിക്കാം
കമ്മലും കല്ലും കൊടുക്കുന്നോളാണവള്‍
അമ്മയെത്തേടുകയായിരിക്കാം
ഒക്കെയുംവാങ്ങുവാനാരിനിയെത്തുമെ-
ന്നോറ്‍ത്തുകരയുകയായിരിക്കാം"

അമ്മതന്‍ കൈയില്‍പിടിച്ചു നടന്നമ്മു
പിന്നെയും പിന്നോട്ടു തന്നെ നോക്കി....

കുന്നും മുകളിലെ പൂക്കൊന്നപ്പെണ്ണിന്ന്

2007-02-21T10:46:00.000+05:30

"കുന്നും മുകളിലെ പൂക്കൊന്നപ്പെണ്ണിന്ന്
പൊന്നും പൂത്താലിയുമിട്ടുവെന്ന്
കൈതവരമ്പില്‍ വച്ചമ്മിണിക്കാറ്റെണ്റ്റെ
കാതില്‍പറഞ്ഞല്ലൊ ചെമ്പരത്തി "

"സത്യമാ തുമ്പീ ഞാന്‍ കണ്ടതാ രാവിലെ
യെത്ര മനോഹരിയാണിന്നവള്‍
ഇന്നലെ കണ്ടവളാണെന്നു ചൊല്ലില്ല
പൊന്നില്‍ കുളിച്ചുള്ള നില്‍പ്പു കണ്ടാല്‍
മേടം കൊടുത്തതാണെന്നാരൊ ചൊല്ലുന്നു
മേടിച്ചതാണെന്നും കേള്‍ക്കുന്നു ഞാന്‍
കൊച്ചു വിഷു വന്നു കൈനീട്ടം തന്നതെ-
ന്നച്ചുക്കിളിയോടു ചൊല്ലിയവള്‍
ഇത്രയും പൊന്നവള്‍ക്കാരു കൊടുത്തതെ-
ന്നെത്രനിനച്ചിട്ടും കിട്ടുന്നില്ല
എങ്കിലുമെണ്റ്റെ പൂത്തുമ്പി നീ യാക്കൊച്ചു
സുന്ദരിക്കോതയെ കാണേണ്ടതാ
മേലാകെ പൊന്നാണു പൊട്ടിച്ചിരിക്കുമ്പോള്‍
ചേലെഴും മുത്തു പൊഴിയുന്നതും "

"എന്നാലവളെയെനിക്കൊന്നു കാണണ-
മൊന്നു വഴിപറ ചെമ്പരത്തീ "

അഛന്‍ വിളിക്കുന്നു പോകാതെ വയ്യെണ്റ്റെ അച്ചന്‍ കോവില്‍പുഴ

2007-02-20T10:52:00.000+05:30

അഛന്‍ വിളിക്കുന്നു പോകാതെ വയ്യെണ്റ്റെ
അച്ചന്‍ കോവില്‍പുഴ കൂട്ടുകാരാ
കുഞ്ഞുകുളിര്‍ കൈ നീ തെല്ലു വിടൂ എനി-
ക്കിന്നുപരീക്ഷയാ പാട്ടുകാരാ

നാളെവരാം പുലറ്‍വേളയില്‍ തന്നെ നി-
ന്നോളവളയത്തിലൂളിയിടാന്‍
മുത്തുമണല്‍മെത്തയിട്ടനിന്‍പൂന്തട്ടില്‍
മുത്തിനിവര്‍ത്തു കുളിച്ചുകേറാന്‍
തിട്ടയില്‍നിന്ന് കുതിച്ചുചാടി വെയില്‍
വെട്ടവുമായൊന്നു നീന്തിയേറാന്‍
വെള്ളിപ്പനിനീറ്‍മണിയൊരുകുമ്പിളില്‍
തുള്ളിചോരാതെയെടുത്തുമുത്താന്‍
ഇക്കിളിയിട്ടുരസിക്കും പരല്‍മീനെ
ഇത്തിരി കൈകളിളക്കിയാറ്റാന്‍
വഞ്ചിമരമിളം പുഞ്ചിരിതൂകിയി-
ട്ടഞ്ചുന്ന പൂക്കള്‍ തരുന്ന കാണാന്‍
കാറ്റുനിനക്കു വള തരുമ്പോള്‍ കവിള്‍
കോണില്‍ നുണക്കുഴിയൊന്നുകാണാന്‍

അഛന്‍ വിളിക്കുന്നു പോകാതെ വയ്യെണ്റ്റെ
അച്ചന്‍ കോവില്‍പുഴ കൂട്ടുകാരാ
അയ്യൊ പിണങ്ങല്ലെ കൂട്ടുകാരാ എനി-
ക്കിന്നു പരീക്ഷയാ പാട്ടുകാരാ

മുട്ടക്കാരന്‍ കുട്ടപ്പേട്ടാ

2007-02-19T11:21:00.000+05:30

"മുട്ടക്കാരന്‍ കുട്ടപ്പേട്ടാ
കുട്ടയുമായിട്ടെങ്ങോട്ടാ"
"മട്ടന്നൂരെ കുട്ടായിക്കീ
മുട്ടകൊടുക്കണ്ടേയിഷ്ടാ"
"മൊട്ടത്തലയില്‍ കുട്ടചുമന്നാല്‍
ഒട്ടും നോവില്ലേചേട്ടാ?"
"കുട്ടക്കടിയില്‍ വട്ടത്തില്‍ തുണി
കെട്ടിയ കണ്ടില്ലേയിഷ്ടാ"
"മുട്ടക്കാരന്‍ കുട്ടപ്പേട്ടാ
മുട്ടന്‍ മുട്ടയൊരെണ്ണം താ.. "
"എട്ടണതന്നൊരു മുട്ടയെടുത്തൊ
കുട്ടീ കീശയിലിട്ടോളൂ"

ചൂല്‍

2007-02-16T12:14:00.000+05:30

അന്നമ്മച്ചേച്ചിക്കു നൂറു കാലുണ്ടേലും
തന്നേ നടക്കുവാനാവില്ലല്ലൊ
താങ്ങിപ്പിടിക്കുവാനേരേലുമുണ്ടെങ്കില്‍
അങ്ങോട്ടുമിങ്ങോട്ടുമോടുമല്ലൊ
മുറ്റത്തെ ചപ്പും ചവറും പൊടികളും
ഒറ്റക്കു വാരിക്കളയുമല്ലൊ..
അന്നമ്മച്ചേട്ടത്തിയുണ്ടെല്ലാവീട്ടിലും
അന്നവുമപ്പവും തിന്നില്ലല്ലൊ

ചെമ്പരത്തീ...

2007-02-15T11:00:00.000+05:30

ചെമ്പട്ടു പാവാടത്തുമ്പുലച്ചെന്‍ മുറ്റ-
ത്തന്‍പോടെ കുമ്പിടും ചെമ്പരത്തീ...
അഞ്ചിതള്‍ത്തുമ്പിലുമല്ലിക്കുളിരിടും
പഞ്ചാരക്കാറ്റു നിനക്കു കൂട്ട്‌
അന്തിവെയില്‍ വന്നു പൊട്ടിട്ടു തന്നപ്പൊള്‍
എന്തു രസമെണ്റ്റെ തമ്പുരാട്ടി
കുഞ്ഞുമഴത്തുള്ളി മുക്കുത്തി തന്നല്ലൊ
അഞ്ജനം പൂമ്പാറ്റ തന്നുവല്ലൊ
ചന്ദനം നല്‍കുവാനമ്പിളി വന്നല്ലൊ
ചന്തത്തില്‍ നീയൊന്നൊരുങ്ങൊരുങ്ങ്‌
കാലത്തു പൂജക്കു കോവിലില്‍ പോകണ്ടെ
കോലോത്തെപ്പെണ്ണേയൊരുങ്ങൊരുങ്ങ്‌

പുട്ട്‌

2007-02-14T14:01:00.001+05:30

കൊല്ലത്തു നിന്നൊരു തീവണ്ടിയില്‍
ചെല്ലപ്പനാശാന്‍ കയറിയല്ലൊ
ടിക്കറ്റെടുക്കാതെ തിക്കിനുള്ളില്‍
വൈക്കത്തു പോകാനിരുന്നുവല്ലൊ
ലാത്തിയുമായൊരു പോലീസേമാന്‍
കുത്തിവെളിയിലിറക്കിയല്ലൊ
അഞ്ചാളു വന്നു പിടിച്ചു കൊണ്ട്‌
അയ്യൊ ജയിലിലടച്ചുവല്ലൊ...

(പുട്ടുകുറ്റിയില്‍ വച്ചു തിളപ്പിച്ചു ഒടുവില്‍ കുത്തിയിറക്കി അഞ്ചു വിരലുകള്‍ കൊണ്ട്‌ വായിലാക്കുന്ന പുട്ടപ്പം)

ആലിപ്പഴം

2007-02-13T16:15:00.000+05:30

ആകാശത്തോപ്പിലെ ഏതു മരത്തില്‍ നി-
ന്നാരു പൊഴിക്കുന്നതാണിതമ്മെ?
നുള്ളിയെടുക്കുമ്പോളുള്ളം കുളിരുന്നൊ-
രാലിപ്പഴമെന്തു ചേലിതമ്മേ...
ഒന്നെടുക്കുമ്പോളടുത്തുണ്ടു വേറൊന്നു
പിന്നെയും പിന്നെയും വീഴുന്നമ്മെ..
പാവാടക്കുമ്പിളിലെല്ലാമെടുക്കുമ്പൊള്
‍പാതിയുമെങ്ങൊ മറയുന്നമ്മെ...
മാമ്പഴത്തിണ്റ്റെ മധുരമില്ലൊട്ടുമേ
ചാമ്പക്ക പോലെ പുളിയുമില്ല
ഞാലിപ്പൂവണ്റ്റെ രുചിയുമില്ലിത്തിരി
ഞാവല്‍പ്പഴത്തിന്‍ നിറവുമില്ല....
ഒട്ടും രുചിയില്ലയെങ്കിലുമിപ്പഴം
ഒത്തിരി ഒത്തിരിയിഷ്ടമമ്മെ...

പാവം മഷിത്തണ്ട്‌

2007-02-09T11:11:00.000+05:30

"കള്ളച്ചിരിയുമായ്‌ കയ്യാല വക്കത്ത്‌
തുള്ളിയിരിക്കുന്ന വെള്ളിത്തണ്ടേ
വെള്ളിക്കുടത്തിലെ വെള്ളവുമായി നീ
വല്ലാതെ കാക്കുന്നതാരെയാണു?"

"പള്ളിക്കൂടത്തിലെ ചെല്ലക്കിടാവുകള്‍
തുള്ളിവരുമിപ്പോളെണ്റ്റെ കുഞ്ഞെ
കല്ലുസ്ളേറ്റിലവരോരൊന്നെഴുതുമ്പോള്‍
തെല്ലു തുടയ്ക്കുവാന്‍ വെള്ളം വേണ്ടെ
മുല്ലകൊടുക്കില്ല വല്ലികൊടുക്കില്ല
ചെല്ലക്കിടാക്കള്‍ക്ക്‌ ഞാന്‍ കൊടുക്കും

ഉള്ളില്‍തെളിയുന്ന നേരംവരെ അവറ്
‍വെള്ളംതുടച്ച്‌ തുടച്ചെഴുതാന്‍. " "

പൊങ്ങിപ്പൊങ്ങിപ്പൊങ്ങി നടക്കും പൊങ്ങച്ചക്കാരന്‍

2007-02-07T17:17:00.000+05:30

പൊങ്ങിപ്പൊങ്ങിപ്പൊങ്ങി നടക്കും
പൊങ്ങച്ചക്കാരന്‍
കുടവയറുംകൊണ്ടോടി നടക്കും
കുടചൂടാ മാമന്‍
പുള്ളിയുടുപ്പും കള്ളിയുടുപ്പും
പുള്ളിക്കെന്തിഷ്ടം
അമ്മുക്കുട്ടിയടുത്തു വിളിച്ചി-
ട്ടുമ്മകൊടുത്താലും
അപ്പുക്കുട്ടനടുത്തുവിളിച്ചൊരു
തൊപ്പിയണീച്ചാലും
കാറ്റു വിളിച്ചാല്‍ കൂടെപ്പോകും
കള്ളന്‍ കുഞ്ഞമ്മാന്‍
തൊട്ടാവാടിപ്പെണ്ണുവിളിച്ചൊരു
പൊട്ടുതൊടീച്ചപ്പൊള്‍
അയ്യൊ പൊട്ടിപ്പോയേ
ഞങ്ങടെ പൊങ്ങച്ചക്കാരന്‍

അന്നയും കാറ്റും

2007-02-06T11:12:00.000+05:30

"പുഞ്ചവയല്‍ക്കടന്നെന്‍ ചുണ്ടിലിത്തിരി
പുഞ്ചിരി നല്‍കിയ കുഞ്ഞിക്കാറ്റെ
ആരു തന്നൂ നിന്‍'റെ ആരോമല്‍ക്കൈകളില്‍
ആരും കൊതിക്കുമീ പൂങ്കുളിരു^ "

"കായല്‍ക്കിടാത്തിക്കു ചിറ്റോള പൊന്‍-വള
കൈകളിലിട്ടു കൊടുത്തനേരം
ആറ്‍ക്കും കൊടുക്കരുതെന്നോതിത്തന്നതാ-
ണാരും കൊതിക്കുമീ പൂങ്കിളിരു^"

"പുഞ്ചവയല്‍ക്കടന്നെന്‍ ചുണ്ടിലിത്തിരി
പുഞ്ചിരി നല്‍കിയ കുഞ്ഞിക്കാറ്റെ
ആരുതന്നൂ നിണ്റ്റെ ആരോമല്‍ക്കൈകളില്‍
ആരും കൊതിക്കുമീ പൂമണത്തെ"

"കന്നിവരമ്പിലെ കൈതപ്പൂപ്പെണ്ണിണ്റ്റെ
കണ്ണില്‍ പൊടിയൂതി നിന്നനേരം
ആറ്‍ക്കുംകൊടുക്കരുതെന്നോതിത്തന്നതാ-
ണാരും കൊതിക്കുമീ പൂമണത്തെ"

"പുഞ്ചവയല്‍ക്കടന്നെന്‍ ചുണ്ടിലിത്തിരി
പുഞ്ചിരി നല്‍കിയ കുഞ്ഞിക്കാറ്റെ
ആരുതന്നു നിണ്റ്റെ ആരൊമല്‍ മെയ്യിലീ
ആരുമേ കാണാത്ത പട്ടുടുപ്പ്‌"

"കറ്റമെതിക്കുന്ന നാടോടിപ്പെണ്ണിണ്റ്റെ
നെറ്റിവിയര്‍പ്പു തുടച്ച നേരം
ആര്‍ക്കും കൊടുക്കരുതെന്നോതിത്തന്നതാ-
ണാരുമേ കാണാത്ത പട്ടുടുപ്പ്‌"

"പുഞ്ചവയല്‍ക്കടന്നെന്‍ ചുണ്ടിലിത്തിരി
പുഞ്ചിരി നല്‍കിയ കുഞ്ഞിക്കാറ്റെ
അമ്മവാങ്ങിത്തന്ന കമ്മലു നല്‍കാം ഞാന്‍
ഇമ്മിണിപ്പൂംകുളിറ്‍ നല്‍കുമോ നീ?
അമ്മാവന്‍ തന്ന കളിപ്പാട്ടം നല്‍കാം ഞാന്‍
ഇമ്മിണിപ്പൂമണം നല്‍കുമോ നീ?"

"അന്നക്കുരുന്നെ നീ എല്ലാമെടുത്തോളൂ
ഒന്നും പകരമെനിക്കു വേണ്ടാ.. "
എന്നുപറഞ്ഞവനെല്ലാം കൊടുത്തുകൊ-
ണ്ടെങ്ങോ പറന്നു മറഞ്ഞുപോയീ..

ആമ്പല്ലൂരമ്പലമുറ്റത്തു നിന്നപ്പൊ അമ്പിളിക്കുട്ടാ നീ എന്തുകണ്ടു

2007-02-02T16:55:00.000+05:30

"ആമ്പല്ലൂരമ്പലമുറ്റത്തു നിന്നപ്പൊ
അമ്പിളിക്കുട്ടാ നീ എന്തുകണ്ടു?"

"അമ്പാരി കണ്ടു ഞാനാനയെ കണ്ടു ഞാന്‍
അമ്പലമുറ്റത്തെയാളെ കണ്ടു
പീപ്പിവാങ്ങിക്കുന്ന മീനൂനെ കണ്ടു ഞാന്‍
ആപ്പിള്‍പോലുള്ള ബലൂണുകണ്ടു.
തൊട്ടാല്‍ നിരങ്ങുന്ന കാറു പിടിക്കുന്ന
മൊട്ടത്തലയന്‍ അപ്പൂനെകണ്ടു
വെള്ളം തെറിക്കുന്ന തോക്കു കണ്ടു വിള-
ക്കുള്ളില്‍ കൊളുത്തുന്ന ബോട്ടുകണ്ടു
കുപ്പിവളയിട്ടു കൊഞ്ചിച്ചിരിക്കുന്ന
കൊച്ചുമിടുക്കി ദേവൂനെക്കണ്ടു"

"ആമ്പല്ലൂരമ്പലമുറ്റത്തു നിന്നെണ്റ്റെ
അമ്പിളിക്കുട്ടാ നീ എന്തുവാങ്ങി?
തൊട്ടാല്‍ നിരങ്ങുന്ന കാറോ തിളങ്ങുന്ന
പൊട്ടാസുവേണ്ടാ കറുത്ത തോക്കൊ?"

"തൂവാലക്കെട്ടഴിച്ചമ്മ ചുടുകണ്ണീര്‍
തൂവിയെടുത്ത മുഷിഞ്ഞ കാശ്‌
ആരുമെടുക്കാതൊടുവിലെനിക്കമ്മ
ആരോമലുമ്മകള്‍ നൂറു തന്നു

അഛന്‍ വരട്ടെ ജയിലില്‍ നിന്നൊത്തിരി
കൊച്ചു കളിപ്പാട്ടം കിട്ടുമല്ലൊ..... "

അങ്ങേലെയമ്മിണിയെന്തു പറഞ്ഞാലും വിങ്ങിക്കരയുന്നതെന്തമ്മേ

2007-02-01T11:49:00.000+05:30

അങ്ങേലെയമ്മിണിയെന്തു പറഞ്ഞാലും
വിങ്ങിക്കരയുന്നതെന്തമ്മേ
കിങ്ങിണിയിട്ടാലും കൊങ്ങിണിയിട്ടാലും
ഒന്നു ചിരിക്കാത്തതെന്തമ്മേ
കുന്നിക്കുരുമണി നൂറുകൊടുത്താലും
ഒന്നും പറയാത്തതെന്തമ്മേ
കുഞ്ഞിക്കവിളില്‍ ഞാനുമ്മകൊടുത്താലും
ഒന്നു കുണുങ്ങാത്തതെന്തമ്മേ
പ്ളാവിലത്തൊപ്പി ഞാന്‍ വച്ചു കൊടുത്താലും
ഒന്നു മിനുങ്ങാത്തതെന്തമ്മേ
പാലക്കാമൊതിരമിട്ടു കൊടുത്താലും
ഒന്നു തിളങ്ങാത്തതെന്തമ്മേ
പൂരംനാള്‍ വാങ്ങിയ മാലകൊടുത്താലും
പുഞ്ചിരി തൂവാത്തതെന്തമ്മേ
പൂക്കളിറുത്തു ഞാന്‍ കൈയില്‍കൊടുത്താലും
കണ്ണു ന്‍ഇറയുന്നതെന്തമ്മേ

അങ്ങേലെയമ്മിണിക്കുമ്മ കൊടുക്കുവാന്‍
അമ്മയും അച്ഛനുമില്ല മോളെ
അമ്മയുമച്ഛനുമില്ലെങ്കിലെങ്ങനെ
അമ്മിണി കൊഞ്ചി ചിരിക്കും മോളെ

നീയേതു പൂവേതു പൂങ്കുരുന്നേ

2007-01-31T15:16:00.000+05:30

പൂവിനോടൊത്തു നീ നില്‍ക്കവെ ശങ്കിച്ചു
പൂവേത്‌ നീയേത്‌ പൂങ്കുരുന്നേ
പൂമണം മുത്തുവാന്‍ വന്നൊരാ കാറ്റു നിന്‍
പുഞ്ചിരിപ്പൂവിറുത്തോമനിപ്പൂ
പൂര്‍ണ്ണേന്ദു രാവിണ്റ്റെ പൂമുഖം താരക
പൂക്കളാല്‍ പൊന്‍-കളം തീര്‍ത്തിടും പോല്‍
പൂന്തേനുറങ്ങുമീ അമ്പിളിപ്പൂമുഖം
പൂവിട്ടു നിന്‍-ചിരി പൂവിതളാല്‍....

ഒന്നരയുരുള ചോറുണ്ണാനെന്നുണ്ണിക്കുട്ടനു കഥ വേണം

2007-01-30T14:07:00.000+05:30

ഒന്നരയുരുള ചോറുണ്ണാനെ-
ന്നുണ്ണിക്കുട്ടനു കഥ വേണം
ഒന്നരവട്ടിപ്പുഞ്ചിരീവീഴാ-
നുണ്ണിക്കുട്ടനു കഥ വേണം
കയ്യുംകെട്ടിയടങ്ങിയിരിക്കാ-
നുണ്ണിക്കുട്ടനു കഥ വേണം
കഞ്ഞീം പയറും കൂട്ടിയിറക്കാ-
നുണ്ണിക്കുട്ടനുകഥ വേണം
എണ്ണേമിഞ്ചേമിട്ടു കുളിക്കാ-
നുണ്ണിക്കുട്ടനു കഥവേണം
എണ്ണക്കുപ്പിമറിച്ചു കളിക്കാ-
നുണ്ണിക്കുട്ടനു കഥ വേണം
തെക്കേമുറ്റത്തൂഞ്ഞാലാടാ-
നുണ്ണിക്കുട്ടനു കഥ വേണം
തെക്കിനിയിറയത്തൊന്നുമയങ്ങാ-
നുണ്ണിക്കുട്ടനു കഥ വേണം
സ്വപ്നം കണ്ടു ചിരിച്ചുമദിക്കാ-
നുണ്ണിക്കുട്ടനു കഥ വേണം

ചെണ്ടക്കാരന്‍ കിണ്ടന്‍ ചേട്ടന്‍

2007-01-30T10:24:00.000+05:30

ചെണ്ടക്കാരന്‍ കിണ്ടന്‍ ചേട്ടന്‍
ചെണ്ടേം കൊണ്ടൊരു വണ്ടീല്‍ കേറി
വണ്ടന്‍മേട്ടെ കുണ്ടില്‍ വീണാ
വണ്ടികുലുങ്ങി കിണ്ടന്‍ ചേട്ടന്‍
ചെണ്ടയുമായിയുരുണ്ടതു കണ്ടൊരു
മണ്ടന്‍ ചെക്കന്‍ തൊണ്ടതുറന്നതു
കണ്ടാ ചെക്കനു മണ്ടക്കിട്ടൊരു
ഞോണ്ടുകൊടുത്തതു കണ്ടവരുണ്ടോ?

നാടെന്നു കേള്‍ക്കുമ്പോളമ്മതന്‍ കണ്ണിത്ര

2007-01-29T14:13:00.000+05:30

നാടെന്നു കേള്‍ക്കുമ്പോളമ്മതന്‍ കണ്ണിത്ര
മിന്നിത്തിളങ്ങുന്നതെന്തമ്മെ
നാട്ടുവഴിയിലെ പൂക്കളെയൊറ്‍ത്തിട്ടൊ..
നാടൊടിപ്പാട്ടിണ്റ്റെയീണമോര്‍ത്തോ?
തുമ്പക്കുരുന്നിണ്റ്റെ തുമ്പത്തെ തുമ്പികള്‍
ഓര്‍മ്മയില്‍ തുള്ളിക്കളിച്ചിട്ടോ?
തൊട്ടാല്‍ മയങ്ങുന്ന നാണംകുണുങ്ങിയാം
തൊട്ടവാടിയെ ഓര്‍ത്തിട്ടൊ?
പിച്ചകപൂമണം കട്ടൊരു കാറ്റന്നു
പിച്ചിയ കാര്യങ്ങളൊര്‍ത്തിട്ടൊ
പാതിരാപെണ്ണിനു പാവാട തയ്ക്കുന്ന
പാലിലം തിങ്കളെ ഓര്‍ത്തിട്ടൊ
പാതിവിരിഞ്ഞു ചിരിച്ചു കുഴയുന്ന
പൂമുല്ലക്കുഞ്ഞിനെയോര്‍ത്തിട്ടൊ?
മഞ്ഞപ്പുടവയണിഞ്ഞു മിനുങ്ങുന്ന
മന്ദാരപൂവിനെയോറ്‍ത്തിട്ടൊ?
തോട്ടുവരമ്പിലെ പാട്ടു വിതക്കുന്ന
തത്തമ്മപ്പെണ്ണിനെയോര്‍ത്തിട്ടൊ
ഉച്ചവെയിലിലും തുള്ള്ഇപ്പറക്കുന്നൊ -
രപ്പൂപ്പന്‍ താടിയെയോര്‍ത്തിട്ടൊ?
നാടെന്നു കേള്‍ക്കുമ്പോളമ്മതന്‍ കണ്ണിത്ര